Zinedine Zidane យល់ថា Alvaro Morata គួរតែគិតឲ្យបានវែងឆ្ងាយជាងនេះ នៅពេលដែលគាត់លេងនៅ Real Madrid ។
Morata បានផ្ទេរចេញពី Real កាលពីរដូវកាលក្តៅ ដើម្បីទៅចូលរួមជាមួយ Chelsea ក្នុងតម្លៃខ្លួន ៥៨ លានផោន ហើយបានលើកឡើងថា គាត់តែងតែមានអារម្មណ៍ថាគាត់មិនត្រូវបានដាក់ឲ្យចូលលេងនៅក្នុងការប្រកួតសំខាន់ៗឡើយ ហើយជាញឹកញាប់តែងតែលេង «ជាកីឡាករបម្រុង»។
គាត់បាននិយាយថា៖ «ខ្ញុំមិនបានលេងនៅក្នុងការប្រកួតវគ្គជម្រុះនៅក្របខណ្ឌ Champions League ឬពេលប៉ះជាមួយ Barcelona, Atletico, Sevilla និង Valencia ទេ»។
ប៉ុន្តែអ្នកចាត់ការទូទៅរបស់ Real Madrid លោក Zidane យល់ថា ការគិតបែបនេះគឺខុសទាំងស្រុង។
Zidane បាននិយាយថា៖ «ពួកគេប្រហែលជាគិតថា មានការប្រកួតមួយចំនួនសំខាន់ជាងការប្រកួតផ្សេងទៀតហើយ ប៉ុន្តែពួកគេនឹងយល់ខុស ប្រសិនបើគេគិតបែបនេះ»។
«មិនមានការប្រកួតណាសំខាន់ជាងការប្រកួតណានោះទេ មានតែស្ថានភាពដែលអ្នកត្រូវលេងនៅក្នុងក្រុម នៅក្នុងប្រព័ន្ធដែលមានលក្ខណៈខុសគ្នា»។
«កីឡាករទាំងអស់ចង់លេងជាមួយ PSG ជាងលេងនៅក្នុងការប្រកួតរបស់យើងជាមួយនឹងក្រុមនៅ La Liga ដែលអាចមានចំណាត់ថ្នាក់នៅក្រោមយើង»។
«បើមើលទៅ វាហាក់ដូចជាជាក់ស្តែងបែបនេះមែន ប៉ុន្តែប្រសិនបើយើងចាប់ផ្តើមគិតបែបនេះ នោះយើងនឹងបង្កើតកំហុស»។
«អ្វីដែលសំខាន់គឺកីឡាករត្រូវមានអារម្មណ៍ថា ពួកគេមានសារៈសំខាន់នៅក្នុងក្រុម។ ប្រសិនបើអ្នកចូលលេង ២០ ឬ ៣០ ឬ ៤០ ប្រកួត នោះអ្នកបានចូលរួមក្នុងជ័យជម្នះនៅលីគហើយ ដែលជាអ្វីដែល Morata បានធ្វើកាលពីរដូវកាលមុន»។
«គាត់ត្រូវគិតអំពីវាក្នុងផ្លូវផ្សេង ហើយសំឡឹងមើលវាដូចជាគាត់បានលេង និងបានចូលរួមចំណែកដល់ជោគជ័យរបស់ក្រុមដូច្នេះដែរ»។
ដោយ៖ តារា
