នៅមុនការប្រកួតនៅក្របខណ្ឌ Premier League នៅថ្ងៃព្រហស្បតិ៍នេះជាមួយ Manchester City គ្រូបង្វឹកជើងចាស់ Arsene Wenger ហាក់មិនចង់និយាយអំពីអនាគតរបស់គាត់នៅ Arsenal ឡើយ។ ក្រុមកាំភ្លើងធំនឹងត្រូវជួបជាមួយ Man City នៅទឹកដី Emirates Stadium តែប៉ុន្មានថ្ងៃប៉ុណ្ណោះ ក្រោយពីទទួលបរាជ័យក្រោមថ្វីជើងរបស់ពួកគេក្នុងលទ្ធផល ៣-០ នៅក្នុងការប្រកួតវគ្គផ្តាច់ព្រ័ត្រក្នុងក្របខណ្ឌ EFL Cup កាលពីថ្ងៃអាទិត្យនេះ។
Wenger បាននិយាយថា៖ «តំណែងរបស់ខ្ញុំគឺនៅតែជារបស់ខ្ញុំនៅឡើយ។ និយាយតាមត្រង់ទៅចុះ នេះវាជាការព្រួយបារម្ភចុងក្រោយដែលខ្ញុំមាននៅពេលនេះ។ ឥឡូវនេះ ខ្ញុំកំពុងផ្តោតលើការត្រៀមលក្ខណៈកូនក្រុមរបស់ខ្ញុំសម្រាប់ការប្រកួត»។
«ខ្ញុំគ្រាន់តែប្រាប់អ្នកនូវអ្វីដែលខ្ញុំគិតប៉ុណ្ណោះ នោះគឺជាការប្រកួតបន្ទាប់។ យើងកំពុងតែស្ថិតក្នុងស្ថានភាពបែបនោះ។ ខ្ញុំមិនសួរអ្នកទេថាតើ តំណែងរបស់អ្នកនឹងត្រូវពិនិត្យមើលឡើងវិញនៅចុងរដូវកាល ឬអត់នោះ»។
«ការងាររបស់ខ្ញុំគឺការប្រកួត។ ការវាយតម្លៃមិនមែនសម្រាប់ខ្ញុំទេ។ ប្រសិនបើអ្នកត្រូវការការបញ្ជាក់ ខ្ញុំអាចឆ្លើយនូវចម្លើយដដែលបាន។ តើវាបានធ្វើឲ្យអ្នកគេងមិនលក់ដែរទេ នៅពេលដែលតំណែងរបស់ខ្ញុំស្ថិតក្នុងភាពមិនច្បាស់លាស់ ឬច្បាស់លាស់នោះ? អ្វីដែលសំខាន់គឺការប្រកួតនៅថ្ងៃព្រហស្បតិ៍នេះ»។
«ខ្ញុំភ្ញាក់ផ្អើលណាស់ដែលខ្ញុំតែងតែត្រូវឆ្លើយនឹងសំណួរដដែលៗ។ ខ្ញុំនៅទីនេះ ២១ ឆ្នាំមកហើយ និងមិនដែលគិតអំពីអ្វីផ្សេងឡើយ ក្រៅតែពីធ្វើតាមការសន្យារបស់ខ្ញុំ»។
«អ្វីដែលគួរឲ្យចាប់អារម្មណ៍នៅក្នុងកីឡាបាល់ទាត់គឺការប្រកួត ហើយវាគឺជាការប្រកួតដែលអ្នកនឹងបានឃើញនៅយប់ថ្ងៃព្រហស្បតិ៍នេះ។ ហើយអ្វីផ្សេងទៀតប្រហែលជាអាចសរសេរជាចំណងជើងព័ត៌មានបាន ប៉ុន្តែវាមិនគួរឲ្យចាប់អារម្មណ៍ឡើយ»។
ដោយ៖ តារា
