Ryan Giggs ដែលជាគ្រូបង្វឹកក្រុមជម្រើសជាតិវេលស៍ចង់ឃើញនូវអ្វីដែលនឹងកើតមានឡើងចំពោះ Gareth Bale និង Aaron Ramsey ដែលអ្នកទាំងពីរត្រូវបានគេសង្ស័យថាអាចនឹងចាកចេញពីក្លឹបរបស់ពួកគេ។
Bale ក្នុងវ័យ ២៨ ឆ្នាំ ហាក់មិនបានជាប់ជាកីឡាករជម្រើសដំបូងជាទៀងទាត់ឡើយ ក្រោមការដឹកនាំរបស់ Zinedine Zidane នៅក្នុងយុទ្ធនាការនៃការប្រកួតរដូវកាលនេះ ដែលនាំឲ្យមានពាក្យចចាមអារ៉ាមដែលថា រូបគាត់អាចនឹងត្រូវបានលក់ចេញនៅចុងរដូវកាលនេះ។
Giggs បាននិយាយថា៖ «ខ្ញុំមិនបារម្ភអំពីអនាគតរបស់គាត់ទេ ព្រោះពេលនេះគាត់លេងនៅក្លឹបដ៏អស្ចា្យទៅហើយ។ នៅពេលដែលអ្នកលេងនៅក្លឹបកំពូល តាមដែលខ្ញុំដឹង អ្នកតែងតែត្រូវបានគេត្រួតពិនិត្យយ៉ាងដិតដល់»។
«ខ្ញុំបានទៅជួបគាត់ ហើយគាត់រីករាយធម្មតាទេ។ គាត់មិនសប្បាយចិត្តទេ នៅពេលដែលគាត់មិនបានចូលលេងជាជម្រើសដំបូង ប៉ុន្តែគាត់បានចូលលេងដំបូងរហូតក្នុងការប្រកួតពីរបីលើកបន្ទាប់មកនេះ។ គាត់មានកម្លាំងមាំមួន និងស័ក្តិសមជាកីឡាករដ៏ខ្លាំងម្នាក់»។
«គាត់បានជួយក្រុមយ៉ាងច្រើន នៅក្នុងការប្រកួតជាមួយ PSG ។ អ្នកគ្រប់គ្នានៅក្នុងប្រទេសវែលស៍សុទ្ធតែដឹងអំពីសារៈសំខាន់របស់ Gareth ។ Gareth Bale ដែលមានកម្លាំងរឹងមាំ និងទម្រង់លេងដ៏អស្ចារ្យដែលល្អបំផុតសម្រាប់ក្រុម»។
សម្រាប់ Ramsey ដែលមានវ័យ ២៧ ឆ្នាំ Giggs យល់ថា គាត់គួរតែលេងនៅ Arsenal បន្តទៀតប្រសើរជាង ព្រោះអតីតតារាឆ្នើមរបស់ Manchester United រូបនេះដឹងពីអត្ថប្រយោជន៍នៃការថ្នឹកនឹងការលេងជាមួយក្រុម។
Giggs បាននិយាយតាមរយៈ The Daily Mail ថា៖ «ខ្ញុំសង្ឃឹមថា Aaron នឹងអាចដោះស្រាយរឿងនេះឲ្យបានឆាប់។ កីឡាករណាដែលធ្វើការពិភាក្សាលើកុងត្រា នោះអ្នកត្រូវតែដោះស្រាយវាឲ្យបានឆាប់តាមដែលអាចធ្វើទៅបាន»។
«គាត់កំពុងលេងនៅក្លឹបដ៏ល្អមួយ។ តាមការយល់ឃើញរបស់ខ្ញុំ នៅពេលដែលអ្នកលេងនៅក្លឹបដែលអ្នកស្គាល់ច្បាស់បែបនេះ វាអាចជួយអ្នកបានយ៉ាងច្រើន។ អ្នកស្គាល់បុគ្គលិក និងកីឡាករទាំងអស់»។
«ខ្ញុំតែងតែរីករាយពេលលេងនៅ United ព្រោះខ្ញុំតែងតែទទួលបានចំណេះដឹងថ្មីៗជានិច្ច ដូច្នេះខ្ញុំមិនដែលមានហេតុផលណាមួយដែលត្រូវចាកចេញឡើយ។ ខ្ញុំរីករាយក្នុងការលេងជាមួយក្រុមបាល់ទាត់របស់ខ្ញុំ។ ខ្ញុំមិនដែលធុញទ្រាន់ ឬមានអារម្មណ៍ថាចង់ចាកចេញទៅក្លឹបណាផ្សេងទៀតឡើយ»។
ក្រុមជម្រើសជាតិវែលស៍ដែលមិនបានជាប់ទៅលេងនៅក្នុងការប្រកួត World Cup នៅឆ្នាំនេះនៅប្រទេសរុស្ស៊ីនោះ នឹងប៉ះជាមួយចិនក្នុងការប្រកួតមិត្តភាពក្នុងនាម Giggs ជាគ្រូបង្វឹកលើកដំបូងនៅថ្ងៃទី ២២ ខែមីនា។
Giggs បាននិយាយថា៖ «ខ្ញុំយល់ថា វាជាពេលវេលាដ៏លំបាកមួយក្នុងរដូវកាលនេះ ខណៈពេលដែលកីឡាករនៅក្របខណ្ឌ Champions League ត្រូវធ្វើការប្រកួតដណ្តើមពានរង្វាន់ ហើយនឹងព្យាយាមដើម្បីរួចផុតពីការកាត់ចោល។ ប៉ុន្តែសម្រាប់ខ្ញុំ ខ្ញុំចង់ឲ្យកីឡាករគ្រប់គ្នាចូលលេងនៅពេលនោះ ព្រោះវាជាការជួបជុំគ្នាលើកទីមួយរបស់ខ្ញុំក្នុងនាមជាគ្រូបង្វឹក»។
ដោយ៖ តារា
