ខ្សែប្រយុទ្ធរបស់ក្រុម Manchester United គឺកីឡាករ Romelu Lukaku និយាយថាកីឡាកររបស់ក្រុមខ្លួនមួយចំនួនដូចជាកំពុងលាក់ខ្លួនក្នុងពេលប្រកួត UEFA Champions League ដែលចាញ់ Sevilla ២-១ កាលពីថ្ងៃអង្គារកន្លងទៅនេះ។
ក្រុមបីសាចក្រហមត្រូវជ្រុះចេញពី ១៦ ក្រុមចុងក្រោយនៃការប្រកួត Champions League ក្រោយបរាជ័យ ២-១ លើ Sevilla ដោយក្នុងការប្រកួតនេះ Lukaku អាចរកគ្រាប់បាល់តាមបានតែមួយគ្រាប់ប៉ុណ្ណោះ។
កីឡាករប៊ែលហ្ស៊ិក របស់ក្រុមបីសាចក្រហម រូបនេះហាក់មិនពេញចិត្តនឹងលទ្ធផលបរាជ័យនេះសោះ ដោយយល់ថាមិត្តរូបក្រុមរបស់ខ្លួនខ្លះហាក់ដូចជាមិនបានខំប្រឹងប្រែងឲ្យអស់ពីកម្លាំងកាយចិត្តសោះ។ Lukaku បានប្រាប់ BT Sport ថា “ដូចជាមានអ្វីម្យ៉ាងមិនប្រក្រតី ព្រោះកីឡាករខ្លះដូចជាកំពុងលាក់ខ្លួនពេលប្រកួតនេះ”។
“ខ្ញុំគិតថាដំបូងដំណើរការដូចជាល្អណាស់ បន្ទាប់មកយើងហាក់ផ្តល់ឱកាសឲ្យគេគ្រប់គ្រងបាល់។ យើងមានឱកាសច្រើនដែរតែមិនអាចស៊ុតចូលបាន” ៕
ដោយ៖ Dara Hunii
