Jose Mourinho គ្រូបង្វឹករបស់ Manchester United បានប្រែក្លាយពីវីរៈបុរសទៅជាមនុស្សអាក្រក់ក្នុងរយៈពេលត្រឹមតែ ៧២ ម៉ោងប៉ុណ្ណោះ បន្ទាប់ពីក្រុមបិសាចក្រហមបានធ្លាក់ចេញពីការប្រកួតនៅក្របខណ្ឌ Champions League ក្រោមថ្វីជើងរបស់ Sevilla កាលពីរាត្រីថ្ងៃអង្គារនេះ។
ត្រឹមតែរយៈពេលបីថ្ងៃប៉ុណ្ណោះ បន្ទាប់ពីបានយកឈ្នះលើ Liverpool ក្នុងលទ្ធផល ២-១ នៅក្របខណ្ឌ Premier League ក្រុមបីសាចក្រហម បានខ្ទាតចេញពីក្របខណ្ឌ Champions League ក្រោយពីចាញ់ ២-១ នៅលើទឹកដី Old Trafford ដែលគ្រាប់បាល់ទាំងពីរគ្រាប់នេះធ្វើឡើងដោយកីឡាករបម្រុង Wissam Ben Yedder ដែលជួយឲ្យ Sevilla ទទួលជ័យជម្នះជាលើកដំបូងនៅ Champions League នៅលើទឹកដីរបស់អង់គ្លេស។
Romelu Lukaku ក៏បានជួយឲ្យ Man United តាមវិញបានតែមួយគ្រាប់ប៉ុណ្ណោះ ដែលវាយឺតពេលពេកសម្រាប់ Man United ក្នុងការឈានទៅដល់វគ្គ ៨ ក្រុមចុងក្រោយ។
លទ្ធផលនេះច្បាស់ណាស់មិនល្អឡើយ ជាពិសេសសម្រាប់អ្នកគាំទ្រដែលមិនពេញចិត្តនឹងប្រព័ន្ធការពាររបស់ក្រុមបីសាចក្រហមខ្លាំងបំផុត ដោយពួកគេបានធ្វើការរិះគន់យ៉ាងចាស់ដៃលើយុទ្ធសាស្រ្តការពារដ៏ទន់ខ្សោយដែល Mourinho បានរៀបចំនៅក្នុងការប្រកួតនេះ ៕
ដោយ៖ Dara Hunii
