Lukaku ថា​៖ Man UTD គួតែទិញកីឡាករល្អៗបន្ថែមទៀតនៅរដូវកាលក្រោយ

12587
  • Romelu Lukaku បាន​និយាយ​ថា វា​មាន​សារៈ​សំខាន់​ណាស់​សម្រាប់ Manchester United ក្នុងការ​ពង្រឹង​សមត្ថភាព​ក្រុម តាម​រយៈ​ការ​ទិញ​កីឡាករ​ថ្មីៗ​បន្ថែម​ទៀត​នៅ​រដូវ​កាល​ក្រោយ​។ ខ្សែ​ប្រយុទ្ធ​សញ្ជាតិ​បែលហ្ស៊ិក​រូបនេះ​គឺ​ជា​កីឡាករ​ម្នាក់​ក្នុង​ចំណោម​កីឡាករ​ដែល​ត្រូវ​បាន Jose Mourinho ទិញ​មក បន្ទាប់​ពី​គាត់មក​ដឹក​នាំ​ក្លឹប​នេះ សម្រាប់​មក​ជួយ​ពង្រឹង​ក្រុម​ឡើងវិញ​ក្រោយ​ទទួល​បាន​លទ្ធផល​មិន​សូវ​គាប់​ប្រសើរ​នៅ​ប៉ុន្មាន​ឆ្នាំ​ចុង​ក្រោយ​នេះ​។

    Image result for Romelu Lukaku

    កីឡាករ Nemanja Matic, Victor Lindelof ហើយ​ថ្មីៗ​នេះ Alexis Sanchez សុទ្ធ​តែ​ត្រូវ​បាន​ផ្ទេរ​មកក្នុង​តម្លៃ​ខ្លួន​ថ្លៃ​នៅ​រដូវ​កាល​នេះ​។ ទោះជា​យ៉ាង​ណា​ក៏​ដោយ Lukaku បាន​សម្តែង​ការ​គាំទ្រ​ដល់​ការ​លើក​ឡើង​ថ្មីៗ​នេះ​របស់​គ្រូបង្វឹក​ដែល​ថា​កូន​ក្រុម​នៅ​មិនទាន់​មាន​សមត្ថភាព​គ្រប់គ្រាន់​នៅ​ឡើយ​ទេ​ក្នុងការ​ដណ្តើមយក​ពាន​រង្វាន់​ធំៗ បន្ទាប់​ពី​ខ្ទាត់​ចេញ​ពី​ក្រប​ខណ្ឌ Champions League នៅ​សប្តាហ៍​នេះ​។

    Related image

    Man United នៅ​តែ​អាច​ប្រឹងប្រែង​ឈាន​ទៅ​ដល់​វគ្គ​ពាក់​កណ្តាល​ផ្តាច់​ព្រ័ត្រ​នៅ FA Cup ប៉ុន្តែ​ទំនង​ជា​នឹង​ត្រូវ​ក្រុម​កំពូល​នៅ Premier League និង​ជា​ក្រុម​ដែល​ស្ថិត​ក្នុង​ចំណាត់​ថ្នាក់ជាប់​ខ្លួន​បំផុត Manchester City ទម្លាក់​ហើយ​។ យោង​តាម Lukaku បាន​ឲ្យ​ដឹង​ថា ក្លឹប​នេះ​នឹង​ចំណាយ​ប្រាក់​វិនិយោគ​លើ​កីឡាករ​ថ្មីៗ​ម្តងទៀត ដើម្បី​ធ្វើ​ឲ្យ Jose Mourinho រីក​រាយ។ គាត់​បាន​និយាយ​ថា៖ «យើង​គឺ​ជា​ក្រុម Manchester United យើង​ត្រូវតែ​ពង្រឹង​ក្រុម​ជា​រៀងរាល់​ឆ្នាំ ហើយ​ខ្ញុំ​ដឹងថា​មាន​កីឡាករ​ល្អៗ​ជា​ច្រើន​ដែល​នឹង​មក​ចូល​រួម​ជាមួយ​យើង​នៅ​រដូវកាល​ក្រោយ។ នោះ​គឺ​ប្រាកដ​ណាស់​»។

    Image result for Romelu Lukaku

    «នោះ​គឺ​ជា​អ្វីដែល​ខ្ញុំ​ទន្ទឹង​រង់ចាំ ដើម្បី​ពង្រឹង​ក្រុម​របស់​យើង ហើយ​វា​ក៏​ជា​អ្វី​ដែល​គ្រូ​បង្វឹក​រង់ចាំ​ផង​ដែរ ព្រោះ​នៅឆ្នាំ​ក្រោយ​យើង​ត្រូវតែ​ដណ្តើម​យក​ជ័យ​ជម្នះ​ឲ្យ​បាន​»។
    «យើង​នឹង​ត្រូវ​ព្យាយាម ដើម្បី​ដណ្តើម​ពាន​រង្វាន់​ឲ្យ​បាន​ច្រើន​តាម​ដែល​យើង​អាច​ធ្វើ​បាន​»។
    Lukaku បាន​បន្ថែម​ទៀត​ថា ទោះ​ជា​យ៉ាងណា​ក៏​ដោយ​គាត់​មាន​អារម្មណ៍​ថា Man United គឺជា​ក្រុម​ដ៏​ខ្លាំង​មួយ ដែល​នឹង​អាច​ឈ្នះ​ពាន​រង្វាន់​មួយ​ចំនួន ហើយ​គាត់​មិន​គិតថា​គូ​ប្រជែងនៅ Champions League ក្រុម Sevilla មាន​សមត្ថភាព​ខ្លាំង​ជាង​ក្រុម​របស់​គាត់​ឡើយ​។

    Related image

    គាត់​បាន​បន្ថែម​ថា៖ «ខ្ញុំ​មិន​ជឿ​ទេ​ថា យើង​មិនមាន​សមត្ថភាព​គ្រប់គ្រាន់​ក្នុង​ការ​ប្រកួតប្រជែង​នៅ​ក្នុង​ការ​ប្រកួត​ធំៗ​នោះ​ឡើយ​»។
    «យើង​បាន​ដឹង​ភ្លាមៗ​បន្ទាប់​ពី​ធ្វើ​ការប្រកួត​ជា​មួយ Sevilla រួច​ថា យើង​មិន​ទាន់​មាន​សមត្ថភាព​ល្អ​គ្រប់គ្រាន់​ទេ ដូច្នេះ​យើង​ព្រម​ទទួល​យក​ការ​រិះគន់​» ៕

    ដោយ៖ Dara Hunii

    ប្រភព :
    foxsportsasia
    ភ្ជាប់ទំនាក់ទំនងជាមួយ Merl Plus
  • អត្ថបទថ្មី