LA Galaxy បានធ្វើការស្វាគមន៍អតីតកីឡាករឆ្នើមរបស់ Manchester United គឺ Zlatan Ibrahimovic មកកាន់ Major League Soccer ។ ខ្សែប្រយុទ្ធឆ្នើមសញ្ជាតិស៊ុតអែតរូបនេះបានចាកចេញពីក្លឹបបិសាចក្រហម បន្ទាប់ពីក្លឹបនៅ Premier League នេះបញ្ចប់កុងត្រារបស់គាត់ក្រោមលក្ខខណ្ឌដែលមិនមានភាពល្អក់កករអ្វីទេកាលពីថ្ងៃព្រហស្បតិ៍កន្លងទៅ។ អំឡុងពេលលេងនៅ Old Trafford គាត់បានចូលលេងឲ្យក្លឹបចំនួន ៥៣លើក និងរកបាន២៩គ្រាប់។
កីឡាករវ័យ ៣៦ឆ្នាំរូបនេះបានរៀបរាប់ប្រាប់ LA Times ថា «បន្ទាប់ពីទទួលបានបទពិសោធន៍លេងនៅទ្វីបអឺរ៉ុប ឈ្នះបានពាន ៣៣ លេងនៅក្នុងក្លឹបល្បីៗនៅលើពិភពលោក លេងជាមួយកីឡាករល្អៗបំផុតក្នុងពិភពលោក ខ្ញុំចង់ត្រលប់ទៅលេងនៅសហរដ្ឋអាមេរិក។ ខ្ញុំចង់ឲ្យមនុស្សម្នារីករាយជាមួយការលេងរបស់ខ្ញុំ និងជ័យជម្នះនៅទីនោះ។ ហើយខ្ញុំក៏ជ្រើសរើសយកក្លឹប Galaxy ។»
ស្របពេលនេះដែរ អ្នកចាត់ការក្រុម LA Galaxy លោក Sigi Schimid មានទំនុកចិត្តយ៉ាងខ្លាំងលើខ្សែប្រយុទ្ធដែលពោរពេញដោយបទពិសោធន៍រូបនេះ ថានឹងបង្កើតភាពអស្ចារ្យសម្រាប់ក្លឹប។
BBC Sport បានស្រង់សម្តីលោក Schmid ថា «គាត់នឹងបង្កើតឥទ្ធិពលវិជ្ជមានខ្លាំងសម្រាប់ក្លឹប ។ ការបន្ថែមកីឡាករកំពូលអ្នករកគ្រាប់បាល់ក្នុងប្រវត្តិសាស្រ្តបាល់ទាត់ ចូលមកក្នុងក្រុមរបស់យើងគឺជួយឲ្យក្លឹបរបស់យើងអាចឈោងចាប់ MLS Cup ជាក់ជាមិនខាន។ ដោយសារតែរូបគាត់ជាកីឡាករដែលមានភាពជោគជ័យខ្លាំងបំផុត យើងមានទំនុកចិត្តទៅលើ Zlatan ថារូបគាត់នឹងក្លាយជាខ្សែប្រយុទ្ធដ៏មានគ្រោះថ្នាក់បំផុតក្នុងលីគរបស់យើង» ៕
ដោយ៖ Dara Hunii
