ខ្សែបម្រើរបស់ Swansea កីឡាករ Ki Sung-yeung យល់ថា មិត្តរួមជាតិរបស់គាត់ Son Heung-min មិនទទួលបានការទទួលស្គាល់ដែលគាត់ស័ក្តិសមនឹងទទួលបាននៅក្នុងក្របខណ្ឌ Premier League នៅឡើយទេ បើទោះបីជារូបគាត់កំពុងតែឡើងជើងបន្ទាប់ពីរកគ្រាប់បាល់បានលើស ២០ គ្រាប់ក្នុងពីររដូវកាលជាប់គ្នានេះក៏ដោយ ។
Son ស៊ុតបញ្ចូលទីបាន ៧ គ្រាប់ក្នុងការបង្ហាញខ្លួន ៤ លើកចុងក្រោយរបស់គាត់សម្រាប់ Tottenham ដោយទទួលបានគ្រាប់បាល់សរុបដល់ទៅ ១៨ គ្រាប់នៅរដូវកាលនេះ ហើយ Ki បានទទូចថា គាត់សមតែទទួលបានការទទួលស្គាល់នៅក្នុងប្រព័ន្ធផ្សព្វផ្សាយដូច Harry Kane និង Dele Alli ផងដែរ ខណៈពួកគេបានរួមចំណែកយ៉ាងច្រើនក្នុងការរីកចម្រើនរបស់ Spurs ក្រោមការដឹកនាំរបស់ Mauricio Pochettino ។
ប្រធានក្រុមជម្រើសជាតិកូរ៉េខាងត្បូងរូបនេះបានប្រាប់អ្នកសារព័ត៌មានមុនការប្រកួតមិត្តភាពនៅថ្ងៃសៅរ៍ជាមួយនឹង Northern Ireland ថា៖ «សម្រាប់ខ្ញុំ គាត់គួរតែទទួលបានកិត្តិយសច្រើនជាងនេះ។ ខ្ញុំមិននិយាយថា Harry Kane និង Dele Alli មិនល្អដូច Son ទេ។ ពួកគេគឺជាកីឡាករកំពូលៗទាំងអស់គ្នា ប៉ុន្តែខ្ញុំគិតថា Son គួរតែទទួលបានការទទួលស្គាល់បន្ថែមទៀតសម្រាប់ខ្ញុំ»។
«ទម្រង់លេងរបស់គាត់នៅរដូវកាលនេះពិតជាអស្ចារ្យណាស់។ គ្រប់គ្នាដឹងថាគាត់លេងបានយ៉ាងល្អនៅក្នុងការប្រកួត ហើយគាត់រក្សាទម្រង់លេងបានយ៉ាងប្រសើរនៅគ្រប់ការប្រកួតហើយថែមទាំងរកគ្រាប់បាល់បានជាច្រើនសម្រាប់ Spurs ទៀតផង ដែលនេះមិនមែនជារឿងងាយស្រួលនោះទេ»។
«ចាប់តាំងពីរដូវកាលមុនរហូតមកដល់ពេលនេះ គាត់បានបង្ហាញអំពីសមត្ថភាពរបស់គាត់ក្នុងនាមជាកីឡាករលំដាប់កំពូលនៅក្របខណ្ឌ Premier League ។ ខ្ញុំមិននិយាយបែបនេះ ដោយសារគាត់ជាជនជាតិអាស៊ីនោះទេ ប៉ុន្តែខ្ញុំគិតថាគាត់គួរតែទទួលបានកិត្តិយសបន្ថែមទៀត។ គាត់ត្រូវតែបង្ហាញខ្លួនច្រើនជាងមុននៅក្នុងកាសែត»។
«គាត់ស៊ុតបញ្ចូលទីគ្រាប់បាល់សំខាន់ៗសម្រាប់ Tottenham ហើយការរក្សាទម្រង់លេងល្អបែបនេះវាមិនមានជារឿងងាយស្រួលសម្រាប់កីឡាករគ្រប់គ្នានោះទេ។ ជួនកាល អ្នកអាចនឹងរងរបួស។ ពេលខ្លះអ្នកមានភាពនឿយហត់ ប្រសិនបើអ្នកលេងឲ្យក្រុមប្រភេទនេះ ប៉ុន្តែគាត់នៅតែរកគ្រាប់បាល់បានដដែល និងអាចរក្សាទម្រង់លេងរបស់គាត់បានល្អជានិច្ច សូម្បីតែសម្រាប់ក្រុមជម្រើសជាតិ» ៕
ដោយ៖ Dara Hunii
