ប្រធានក្លឹប Bayern Munich លោក Karl-Heinz Rummenigge បានបញ្ជាក់ថា ម្ចាស់ជើងឯកក្របខណ្ឌ Bundesliga នឹងលក់ខ្សែប្រយុទ្ធ Robert Lewandowski ចេញនៅពេលវេលាដែលស័ក្តិសមសម្រាប់ពួកគេតែប៉ុណ្ណោះ។
Lewandowski ត្រូវបានគេរាយការណ៍ថាគឺជាគោលដៅដែលម្ចាស់ជើងឯកនៅ La Liga ក្រុម Real Madrid តាមប្រមាញ់ ហើយកីឡាករសញ្ជាតិប៉ូឡូញរូបនេះក៏បានជួលភ្នាក់ងារថ្មីឈ្មោះ Pini Zahavi ផងដែរ ដែលគាត់បានបង្ហើបប្រាប់ថា Robert អាចនឹងកំពុងតែចង់ចាកចេញពីទឹកដី Allianz Arena ។
ប៉ុន្តែលោក Rummenigge បានបញ្ជាក់ថា កីឡាករវ័យ ២៩ ឆ្នាំដែលស៊ុតបញ្ចូលទីបាន ៣២ គ្រាប់ក្នុងរដូវកាលនេះ អាចចាកចេញបានលុះត្រាតែ Bayern យល់ថានេះជាការសម្រេចចិត្តដ៏ត្រឹមត្រូវសម្រាប់ក្លឹប។
Rummenigge បានប្រាប់ទស្សនាវដ្ដី Kicker ថា៖ “ខ្ញុំតែងតែចងចាំឆ្នាំ ២០០៨ នៅពេលដែលយើងទទួលបានសំណើដ៏ពេញចិត្តពី Chelsea ដែលចង់ទិញ Franck Ribery។ ចាប់តាំងពីពេលនោះមក ក្នុងពិភពបាល់ទាត់ទាំងមូលសុទ្ធតែបានដឹងថា គ្មាននរណាម្នាក់អាចទិញកីឡាកររបស់ Bayern Munich បានទេ ប្រសិនបើ Bayern Munich មិនចង់លក់នោះ។ ខ្ញុំចង់ធានា ១០០ ភាគរយថា Robert គឺនឹងនៅលេងឲ្យ Bayern នៅរដូវកាលក្រោយនេះ”។
Lewandowski នៅជាប់កុងត្រារយៈពេលជាងបីឆ្នាំទៀតជាមួយក្រុម Die Roten (Bayern)។
ដោយ៖ Dara Hunii
