អតីតកីឡាករខ្សែប្រយុទ្ធ របស់ក្លឹប Manchester United គឺកីឡាករ Zlatan Ibrahimovic បានទៅដល់សហរដ្ឋអារមេរិក ដើម្បីទៅចូលរួមជាមួយក្លឹបថ្មីរបស់គេ គឺ Los Angeles Galaxy ដោយមានការគាំទ្រយ៉ាងពុះកញ្ជ្រោលពីសំណាក់អ្នកគាំទ្រ ក្នុងការស្វាគមន៍រូបគេទៅកាន់ទីក្រុងនេះ។
កីឡាករវ័យ ៣៦ ឆ្នាំរូបនេះបានផ្ទេរចេញពី Old Trafford ដែលជាកន្លែងដែលរូបគេអាចរកបានគ្រាប់បាល់ ២៩ គ្រាប់ពីការប្រកួត ៥៣ ប្រកួត។
Ibrahimovic បាននិយាយនៅក្នុងសេចក្តីថ្លែងការដែលចេញផ្សាយដោយក្លឹបថ្មីនេះថា “ការមកលេងនៅអាមេរិកនេះ វាកាន់តែសក្តិសមសម្រាប់ខ្ញុំនៅ ក្នុងក្លឹបដ៏ជោគជ័យក្នុងលីគកំពូលនេះ។ ខ្ញុំរំភើបណាស់ដែលបានមកចូលរួមជាមួយក្លឹបដែលមានប្រវត្តិឈ្នះរាប់មិនអស់ ដែលឈរជើងនៅក្នុងពិភពបាល់ទាត់នៅ Los Angeles នេះជាង ២០ ឆ្នាំមកហើយ ”។
Ibrahimovic បានត្រៀមខ្លួនសម្រាប់ការដាក់ចូលលេងបានភ្លាប់ ហើយគេក៏អាចនឹងបង្ហាញខ្លួនជាលើកដំបូងក្នុងការប្រកួតជាមួយក្លិបក្បែរខាង នោះគឺ Los Angeles FC ឆាប់ៗនេះដែរ ៕
ដោយ៖ Dara Hunii
