Jupp Heynckes គ្រូបង្វឹករបស់ Bayern Munich បាននិយាយថា កីឡាករដែល Real Madrid កំពុងតាមប្រមាញ់ Robert Lewandowski នឹងអាចបំបែកកំណត់ត្រាគ្រាប់បាល់ស៊ុតបញ្ចូលទីនៅក្របខណ្ឌ Bundesliga បាន ប្រសិនបើខ្សែប្រយុទ្ធរូបនេះមិនចាកចេញទៅណានោះទេ។
កីឡាករជម្រើសជាតិប៉ូឡូញរូបនេះផ្ទេរមកកាន់ក្លឹបនៅអាល្លឺម៉ង់ភ្លាមៗ ក្រោយពីចាកចេញពី Borussia Dortmund និង Lech Poznan ក្នុងឆ្នាំ ២០១០ ដោយស៊ុតបញ្ចូលទីបាន ១៧៤ គ្រាប់ ក្នុងការបង្ហាញខ្លួនចំនួន ២៥២ លើកក្នុងរយៈពេលប្រាំបីរដូវកាលនេះ។ ក្រោយពីរកបាន ៧៤ គ្រាប់សម្រាប់ Dortmund កីឡាករ Lewandowski បានផ្លាស់ទៅកាន់ទឹកដី Allianz Arena ក្នុងឆ្នាំ ២០១៤ ហើយគាត់ក៏រកបានមួយរយគ្រាប់ជាមួយ Bayern ។
ទម្រង់លេងបែបនេះបានធ្វើឲ្យគាត់មានការភ្ជាប់ទំនាក់ទំនងជាមួយក្រុម Los Blancos (Real) ហើយពួកគេនឹងមិនឈប់តាមប្រមាញ់កីឡាកររូបនេះទេ ទោះបីជាប្រធានក្លឹប Bayern លោក Karl-Heinz Rummenigge បានលើកឡើងថា កីឡាករវ័យ ២៩ ឆ្នាំរូបនេះនឹងមិនត្រូវបានអនុញ្ញាតឲ្យចាកចេញក៏ដោយ។ ថ្លែងចំពោះការមន្ទិលសង្ស័យថ្មីៗនេះ លោក Heynckes ដែលជាកីឡាករស៊ុតបញ្ចូលទីបានច្រើនជាងគេលំដាប់ទីបីនៅក្របខណ្ឌលីគ (២២០ គ្រាប់) ជឿថា ខ្សែប្រយុទ្ធដ៏ឆ្នើមរបស់គាត់នឹងបំបែកកំណត់ត្រាស៊ុតបញ្ចូលទីរបស់គាត់នាពេលដ៏ខ្លីខាងមុខនេះ។
គ្រូបង្វឹកវ័យ ៧២ ឆ្នាំរូបនេះបានប្រាប់អ្នកសារព័ត៌មាននៅមុនការប្រកួតជាមួយក្រុម Borussia Dortmund ថា “ខ្ញុំដឹងអំពីព័ត៌មាននៅអេស្ប៉ាញ វាពោរពេញទៅដោយពាក្យចចាមអារ៉ាម ។ ខ្ញុំគិតថា Lewandowski នឹងបំបែកកំណត់ត្រាស៊ុតបញ្ចូលទីនៅ Bundesliga របស់ខ្ញុំ ក្នុងរយៈពេល ២ ឬ ៣ ឆ្នាំខាងមុខនេះ ” ៕
ដោយ៖ Dara Hunii
