Pep Guardiola បាននិយាយថា Kyle Walker មានសមត្ថភាពខ្ពស់ដូចនឹង Philipp Lahm និង Eric Abidal ដោយសារតែគាត់ចេះបត់បែនតាមកាលៈទេសៈ។ ខ្សែការពារស្តាំរបស់ Manchester City ត្រូវបានដាក់ឲ្យលេងជាខ្សែការពារកណ្តាលតាមរយៈការរៀបចំរបស់គ្រូបង្វឹកជម្រើសជាតិអង់គ្លេស Gareth Southgate នៅក្នុងការប្រកួតមិត្តភាពជាមួយហូឡង់ និងអ៊ីតាលី ។
Guardiola ដែលបានបណ្តុះបណ្តាល Abidal នៅ Barcelona និង Lahm នៅ Bayern Munich ក្នុងតួនាទីផ្សេងគ្នានោះ មានការពេញចិត្តដែលឃើញ Southgate ដាក់ខ្សែការពាររបស់គាត់ឲ្យលេងតាមរបៀបនេះ។ ថ្លែងទៅកាន់អ្នកសារព័ត៌មាន ខណៈពេលដែលកូនក្រុមរបស់គាត់បានវិលត្រឡប់មកពីបំពេញកាតព្វកិច្ចសម្រាប់ជាតិ ។
“Walker មានសមត្ថភាពក្នុងការលេងក្នុងតំណែងនោះ ខ្ញុំគិតថាវាជាការសម្រេចចិត្តដ៏ត្រឹមត្រូវរបស់ Gareth Southgate ព្រោះគាត់អាចលេងក្នុងតំណែងទាំងពីរបាន។ ជាមួយនឹងខ្សែការពារបីនាក់នៅក្រោម អ្នកនឹងអាចជួយខ្សែបម្រើបានបន្ថែមទៀត ព្រោះកាយសម្បទារបស់គាត់មានអំណោយផលណាស់ ។ គាត់មានល្បឿនលឿន មានភាពឆ្លាតវៃ ពូកែប៉ះបាល់ខ្លី និងបាល់វែង អាចឡើងលើ និងចុះការពារវិញបានយ៉ាងរហ័ស។ ដូច្នេះ គាត់ស័ក្តិសមនឹងលេងនៅតំណែងនោះណាស់” ។
“គាត់ជាកីឡាករមានចិត្តទូលាយ ហើយមិនប្រកាន់តំណែងលេងទេ ឲ្យតែគាត់អាចលេងបាន ។ ទាំង Abidal និង Philipp Lahm អាចលេងបានក្នុងតំណែងច្រើន ហើយអាចសម្របខ្លួនបានយ៉ាងឆាប់រហ័ស ព្រោះពួកគេពោរពេញដោយសមត្ថភាពពេញខ្លួន ហើយ Kyle ក៏អញ្ចឹងដែរ”។
Guardiola បានបន្ថែមទៀតថា គាត់នឹងមិនជ្រៀតជ្រែកលើការរៀបចំរបស់ Southgate ដែលចង់ដាក់ Walker ឲ្យលេងនៅខ្សែណាសម្រាប់ការប្រកួត World Cup នោះទេ។ ទាំងនោះគឺជាការសម្រេចចិត្តរបស់គាត់ ខ្ញុំមិនឡូកដៃក្នុងរឿងនោះទេ។ Walker មិនបានលេងនៅក្នុងតំណែងនោះទេ (សម្រាប់ Man City) ប៉ុន្តែការសម្រេចចិត្តសម្រាប់ក្រុមជម្រើសជាតិគឺស្ថិតលើគ្រូបង្វឹកក្រុមជម្រើសជាតិ ៕
ដោយ៖ Dara Hunii
