លោក Zidane ៖ ​ខ្ញុំ​គិត​ថា Gareth Bale ​នឹង​បន្ត​លេង​នៅ​ទី​នេះ​ទៀត

16879

ខ្សែ​ប្រយុទ្ធ​ស្លាប​សញ្ជាតិ​វេលស៍កីឡាករ Gareth Bale ​រូបនេះ​ត្រឹមតែជា​កីឡាករ​បម្រុង​អំឡុង​ការប្រកួត​យក​ឈ្នះលើ Juventus នៅ​ក្របខណ្ឌ Champions League កាល​ពី​ពាក់​កណ្តាល​សប្តាហ៍​មុន។

Image result for Gareth Bale

គាត់​ដូចជា​ចង់​មាន​ឱកាស​ចូលលេង​ពេល​ប៉ះ​ជាមួយ Juvetus ណាស់​បន្ទាប់​ពី​កីឡាករ​រូបនេះ​ស៊ុត​បញ្ចូល​ទី​បាន​ពីរ​គ្រាប់​ក្នុង​លទ្ធផល ៣-០ ជួយ​ឲ្យ​ក្រុម​យក​ឈ្នះ​លើ Las Palmas និងជ័យជម្នះ​ក្នុង​លទ្ធផល ៦-៣ ដែល​ក្រុម​ទទួល​បាន​លើ Girona ប៉ុន្តែ​ផ្ទុយ​ទៅ​វិញ គាត់​ត្រូវអង្គុយ​ជា​កីឡាករ​បម្រុង​ពេញ ៩០ នាទី។ ទោះបី​ជា​យ៉ាង​ណាក៏​ដោយ នៅក្នុង​ការប្រកួត​ជាមួយ Atletico Madrid កាល​ពី​យប់​ថ្ងៃអាទិត្យ​នេះ គេ​ឃើញ​ថា Bale បាន​ចូលលេង​ពេញ​មួយ​ប្រកួត​ទាំងមូល​ដោយ​បញ្ចប់​ត្រឹមលទ្ធផល ១-១ មុនពេល​ត្រូវ​ជួប​ជាមួយ Juventus ម្តង​ទៀត​នៅក្នុង​ការប្រកួត​ជើង​ទីពីរ​វគ្គ ប្រាំបី​ក្រុម​ចុងក្រោយ​នៅ Champions League ។

Image result for Gareth Bale

នៅក្នុង​សន្និសីទ​សារព័ត៌​មាន​ក្រោយ​ពី​ចប់​ការប្រកួត​នៅ​ថ្ងៃ​អាទិត្យ​នេះ Zidane បាននិយាយ​ថា៖ “ខ្ញុំ​ដឹង​ថា គាត់​មាន​អារម្មណ៍​មិន​ល្អ​ឡើយ តែ​នេះ​ជា​រឿង​ធម្មតា​ទេ ។កីឡាករ​គ្រប់​គ្នា​សុទ្ធតែ​ចង់​ចូល​លេង​នៅ​គ្រប់​ការប្រកួត​។ យើង​ដឹង​ច្បាស់​ថា​គាត់​ជា​កីឡាករ​ដែល​មាន​សមត្ថភាព​ខ្ពស់ និង​ដឹង​នូវ​អ្វី​ដែល​គាត់​បាន​ធ្វើ ។ ខ្ញុំ​ត្រូវតែ​ធ្វើការ​សម្រេច​ចិត្ត ប៉ុន្តែ​ប្រសិន​បើ​គាត់​មិនបាន​ចូល​លេង​ក្នុង​ពីរ​ប្រកួត នោះ​មិនមែន​មាន​ន័យថា​គាត់​លេង​មិន​បាន​ល្អ​នោះ​ទេ។ ខ្ញុំ​នៅតែ​គិត​ថា គាត់​ជា​កីឡាករ​ដ៏​សំខាន់ម្នាក់​ជានិច្ច​”។

Image result for Gareth Bale with Zidane

លោក Zidane បាន​បន្ថែម​ទៀត​ថា៖ “សម្រាប់​ខ្ញុំ​គិត​ថា គាត់​នឹង​បន្ត​លេង​នៅ​ទី​នេះ​ទៀត ប៉ុន្តែ​ខ្ញុំ​មិនដឹង​នូវ​អ្វី​គ្រប់យ៉ាង​ដែល​នឹង​កើត​មាន​ឡើង​នោះ​ទេ ។ គាត់​នឹងមិន​បាត់បង់​ការ​តាំង​ចិត្ត​នោះ​ទេ គឺ​ដូចជា​កូន​ក្រុម​ដទៃ​ទៀត​ផងដែរ​។ វា​ជា​កិច្ចការ​របស់​ខ្ញុំ​ដែល​ត្រូវ​ព្យាយាម​ធ្វើ​ឲ្យ​ប្រាកដ​ថា គាត់​អាច​លេងបាន​ល្អ​ដូច​រាល់ដង​ជា​និច្ច។ គាត់​គឺជា​កីឡាករ​ដ៏​សំខាន់​ម្នាក់ ប៉ុន្តែ​កីឡាករ​ផ្សេង​ទៀត​ដែល​បាន​លេង​ជាមួយ Juventus ក៏​ធ្វើ​បាន​ល្អ​ដែរ។ កីឡា​បាល់ទាត់​គឺ​បែប​នេះ​ហើយ​”៕

ដោយ៖ តារា

ប្រភព :
foxsportsasia
ភ្ជាប់ទំនាក់ទំនងជាមួយ Merl Plus
  • អត្ថបទថ្មី