Sam Allardyce គ្រូបង្វឹករបស់ Everton នឹងធ្វើការពិភាក្សាជាមួយ Wayne Rooney បន្ទាប់ពីអតីតប្រធានក្រុមរបស់ Manchester United រួបនេះបានបញ្ចេញប្រតិកម្មខឹងសម្បា នៅពេលដែលត្រូវប្ដូរចេញក្នុងការប្រកួតនៅទីក្រុង Merseyside ។
Rooney ត្រូវបានប្ដូរចេញក្រោយពីលេងបានត្រឹមតែ ៥៧ នាទីប៉ុណ្ណោះកាលពីសប្តាហ៍មុនពេលប៉ះជាមួយ Liverpool ហើយច្បាស់ណាស់ថាគាត់មិនពេញចិត្តនឹងការសម្រេចចិត្តបែបនេះឡើយ ក្រោយពីគេឃើញគាត់អង្គុយរអ៊ូតែម្នាក់ឯងនៅលើកៅអី។ Allardyce បានយល់ច្បាស់ពីការអាក់អន់ចិត្តរបស់កីឡាករវ័យ ៣២ ឆ្នាំរូបនេះ ហើយគាត់នឹងរកពេលជួបជាមួយ Rooney នៅសប្តាហ៍នេះ ដើម្បីធានាថាគ្មានការអាក់អន់ចិត្តណាមួយនៅក្នុងស្ថានភាពនេះទេ។
Allardyce បានប្រាប់វិទ្យុ TalkSPORT ថា៖ “ការអាក់អន់ចិត្តរបស់ Wayne គឺព្រោះតែគាត់ធ្លាប់លេងនៅ Everton មកជាយូរហើយ ។ គាត់ក្លាយជាកីឡាកររបស់ Everton ពេញមួយជីវិតរបស់គាត់ទៅហើយ។ គាត់បានបង្ហាញខ្លួនជាលើកដំបូងសម្រាប់ Everton នៅអាយុ ១៦ ឆ្នាំ។ គាត់បានលេងនៅក្នុងការប្រកួតដ៏សំខាន់មួយជាមួយ Liverpool នៅលើទីលានផ្ទាល់របស់គាត់ ប៉ុន្តែបែរជាត្រូវគ្រូបង្វឹកប្ដូរគាត់ចេញទៅវិញ”។
“គាត់ពិតជាមិនអាចទទួលយកវាបាននោះទេ ហើយត្រូវតែបង្ហាញពីការមិនសប្បាយចិត្តរបស់គាត់បែបនេះហើយ។ យើងនឹងជួបពិភាក្សាគ្នានៅសប្តាហ៍ក្រោយអំពីបញ្ហានេះ ហើយយើងនឹងបានដឹងពីអារម្មណ៍ពិតរបស់គាត់។ ខ្ញុំជឿថា ពេលនេះគាត់មុខជាបានស្ងប់ចិត្តបន្តិចហើយ”៕
ដោយ៖ តារា
