ខ្សែការពារ Real Madrid កីឡាករ Marcelo ជឿថា Cristiano Ronaldo នៅតែអាចស៊ុតបញ្ចូលទី FC Bayern München ក្នុងការប្រកួតនៅក្របខណ្ឌ UEFA Champions League នៅសប្តាហ៍ក្រោយនេះដដែល ទោះបីជាពួកគេប្រឹងបិទយ៉ាងណាក៏ដោយ។
Ronaldo បានស៊ុតបញ្ចូលទីនៅក្នុងការប្រកួតទាំង ១២ លើកចុងក្រោយរបស់គាត់នៅក្នុងការប្រកួតទាំងអស់។ អំឡុងពេលនោះ កីឡាករសញ្ជាតិព័រទុយហ្គាល់រូបនេះបានបង្កើនគ្រាប់បាល់ស៊ុតបញ្ចូលទីរបស់គាត់ពីចំនួន ២២ គ្រាប់ ឲ្យឡើងរហូតដល់ ៤២ គ្រាប់ក្នុងរដូវកាលនេះ។
Los Merengues (Real) នឹងត្រូវប្រឈមនឹងការធ្វើតេស្តមួយដ៏លំបាកបំផុតក្នុងរដូវកាលនេះនៅថ្ងៃពុធសប្តាហ៍ក្រោយ នៅពេលដែលពួកគេត្រូវប៉ះជាមួយម្ចាស់ជើងឯក Bundesliga ក្លឹប FC Bayern München នៅកីឡដ្ឋាន Allianz Arena សម្រាប់ការប្រកួតជើងទីមួយនៅក្របខណ្ឌ Champions League វគ្គពាក់កណ្តាលផ្តាច់ព្រ័ត្រ ប៉ុន្តែ Marcelo ជឿជាក់ថា គ្មាននរណាអាចបញ្ឈប់ Ronaldo មិនឲ្យស៊ុតបញ្ចូលទីបានឡើយ។
យោងតាមទស្សនាវដ្ដី FourFourTwo កីឡាករ Marcelo បានប្រាប់អ្នកសារព័ត៌មានថា៖ ” Ronaldo គឺជាកីឡាករដ៏ឆ្នើមបំផុតនៅលើលោក យើងមានទំនុកចិត្តលើគាត់យ៉ាងខ្លាំង ដូចដែលយើងមានចំពោះកីឡាករទាំងអស់របស់យើងផងដែរ ។ ខ្ញុំប្រាកដណាស់ថា គាត់នឹងអាចរកគ្រាប់បាល់បានបន្ថែមទៀត ដើម្បីបន្ថែមចំនួនគ្រាប់បាល់ទៅក្នុងចំនួនគ្រាប់បាល់សរុបទាំង ១២ ប្រកួតរបស់គាត់ផងដែរ” ។
បញ្ជាក់ផងដែរថា ក្លឹប Real Madrid ត្រូវប៉ះជើងឯកក្របខ័ណ្ឌ Bundesliga ក្លឹប FC Bayern München ក្នុងវគ្គពាក់កណ្ដាលផ្ដាច់ព្រ័ត្ត្រនៃពានរង្វាន់ UEFA Champion League នៅសប្ដាហ៍ក្រោយនេះ ៕
ដោយ៖ តារា
