អ្នកចាំទីរបស់ក្លឹប Real Madrid គឺ Keylor Navas បាននិយាយថា រូបគេមិនដែលខ្លាចក្នុងការប្រកួតប្រជែងនោះទេប្រសិនបើក្លឹបសម្រេចចិត្តចុះកុងត្រាជាមួយអ្នកចាំទីថ្មីបន្ថែមទៀតនោះ។ អ្នកចាំទីសញ្ជាតិ កូស្តារីការូបនេះបាននិយាយបែបនេះនៅក្នុងកិច្ចប្រជុំសមាជិកក្លឹបមួយ ដោយមានប្រធានក្លឹបគឺលោក Florentino Perez ចូលរួមផងដែរ។
តបទៅនឹងសំណួររបស់សមាជិកក្លឹបម្នាក់ Nava បានបញ្ជាក់ថា៖ “ខ្ញុំមិនដែលនិយាយថា ក្លឹបមិនគួរចុះកុងត្រាជាមួយអ្នកចាំទីបន្ថែមនោះឡើយ! ថ្វីត្បិតតែខ្ញុំមិនមែនជាអ្នកនៅទីនេះក្តី តែខ្ញុំស្រឡាញ់ពេញចិត្តក្លឹបនេះដូចជាអ្នកទាំងអស់គ្នាដែរ។ ខ្ញុំខិតខំហ្វឹកហាត់រាល់ថ្ងៃគឺដើម្បីតែអាវមួយហ្នឹង”។
Perez ក៏បាននិយាយការពារ Navas ដែរ ដោយលោកលើកឡើងថា៖ “លោកបានយកឈ្នះបេះដូងរបស់អ្នកគាំទ្រ Real Madrid ហើយ។ លោកយកបានបេះដូងរបស់ពួកគេដោយសារតែទេពកោសល្យ វិជ្ជាជីវៈ និងអាកប្បកិរិយាល្អរបស់លោក”។
“វាជាមោទកភាពសម្រាប់ក្លឹបទាំងមូលដែលមានលោក ជាអ្នកចាំទី មិនថាអ្នកណាគេនិយាយយ៉ាងម៉េចពីលោកនោះឡើយ ខ្ញុំជឿជាក់ថាលោកនឹងនៅជាមួយពួកយើងច្រើនឆ្នាំទៅមុខទៀត។ យើងទាំងអស់គ្នាចង់ឲ្យលោកនៅទីនេះជាមួយពួកយើងដើម្បីបង្កើតប្រវត្តិសាស្ត្រ និងជួយឲ្យ Real ទទួលបានជោគជ័យកាន់តែធំៗជាងពេលនេះទៅទៀត”៕
ដោយ៖តារា
