អ្នកចាត់ការទូទៅក្រុមជម្រើសជាតិអាល្លឺម៉ង់ លោក Oliver Bierhoff មានជំនឿយ៉ាងមុតមាំថា កីឡាករអ្នកចាំទី Manuel Neuer នឹងអាចចូលលេងឲ្យក្រុមជម្រើសជាតិអាល្លឺម៉ង់ សម្រាប់ប្រកួតពានរង្វាន់បាល់ទាត់ពិភពលោកនៅប្រទេសរុស្ស៊ី។
Neuer ដែលកំពុងសម្រាកព្យាបាលជើងបាក់ បានអវត្តមានពីក្រុមជម្រើសជាតិ និងក្លឹប Bayern Munchen ចាប់តាំងពីខែកញ្ញាមក។ កីឡាករអ្នកចាំទីវ័យ ៣២ ឆ្នាំរូបនេះ ត្រូវបានរាយការណ៍ថាបានកំណត់ឲ្យត្រលប់ទៅការហ្វឹកហាត់វីញនៅសប្ដាហ៍ក្រោយ ប៉ុន្តែបញ្ហាប្រឈមរបស់គាត់នោះគឺគាត់ត្រូវព្យាយាមធ្វើឲ្យជាពីរបួសសម្រាប់ពានរង្វាន់ពិភពលោក។
Bierhoff បានមានប្រសាសន៍នៅក្នុងគេហទំព័ររបស់ខ្លួនថា៖ “ខ្ញុំនៅតែមានជំនឿយ៉ាងមុតមាំថា Manuel នឹងបានទៅលេង World Cup ។ សម្រាប់ករណីរបស់ Manuel ខ្ញុំជឿថាគាត់មានការតាំងចិត្តខ្ពស់ក្នុងការព្យាយាមធ្វើឲ្យខ្លួនឯងជាពីរបួស។ លោក Low បានកំណត់ថាឈុតដំបូងរបស់អាល្លឺម៉ង់នឹងបង្ហាញនៅថ្ងៃទី ១៥ ឧសភា ប៉ុន្តែ លោក Bierhoff បានស្នើឲ្យដាក់បញ្ចូល Neuer ទៅក្នុងក្រុម ដោយលោកបញ្ជាក់ថាគាត់មានសិទ្ធិស្នើសុំអ្នកចាំទី”។
គាត់បានបន្តទៀតថា៖ “ថ្ងៃផុតកំណត់ពិតប្រាកដគឺនៅថ្ងៃទី ៤ មិថុនា សម្រាប់ការរើសសមាសភាពកីឡាករ ២៣រូប “។
គួរបញ្ជាក់ថាអាល្លឺម៉ូងនឹងបើកឆាកប្រកួតជាមួយម៉ិកស៊ិកនៅថ្ងៃទី ១៧ មិថុនា នៃពានរង្វាន់ World Cup ៕
ដោយ៖តារា
