កីឡាកររបស់ក្លឹប Real Madrid បានបង្កឲ្យមានការខឹងសម្បារយ៉ាងខ្លាំងពីសំណាក់អ្នកគាំទ្រនៅ Camp Nou នៅពេលដែលពួកគេមិនព្រមទាត់បាល់ចេញក្រៅ ខណៈឃើញ Suarez ដួលដោយសាររងរបួសក្រោយប៉ះទង្គិចជាមួយក្រុមភ្ញៀវហើយនុះ។ ទោះជាយ៉ាងណាក៏ដោយ Ramos បាននិយាយថា Real នឹងមិនទាត់បាល់ចេញក្រៅដើម្បីផ្អាកការប្រកួតទេ ព្រោះពួកគេស្គាល់អត្តចរិតរបស់ Suarez យ៉ាងច្បាស់។
យោងតាមទស្សនាវដ្តី FourFourTwo កីឡាករ Ramos បាននិយាយថា៖ “រាល់ពេលដែលមានកីឡាករណាម្នាក់ទទួលរងរបួសនៅទីលានប្រកួត ហើយយើងគិតថាវាមានសភាពធ្ងន់ធ្ងរ នោះយើងនឹងទាត់បាល់ចេញក្រៅ។ វាជាសញ្ញានៃការគោរព ។ ប៉ុន្តែ ដោយសារយើងស្គាល់ចរិត ស្តាយ៍ និងបុគ្គលិកលក្ខណៈរបស់គាត់អស់ទៅហើយនោះ ខ្ញុំគិតថាវាមិនចាំបាច់ក្នុងការធ្វើបែបនេះឡើយ”។
ក្រុម Catalans (Barca) បានធ្វើការប្រកួតនៅតង់ទីពីរជាមួយ Real ដោយមានកីឡាករតែ ១០ នាក់ប៉ុណ្ណោះ បន្ទាប់ពី Sergi Roberto ត្រូវបានបណ្តេញចេញពីការប្រកួត ប៉ុន្តែពួកគេនៅតែអាចទទួលបានលទ្ធផលស្មើ ដើម្បីរក្សាកំណត់ត្រាមិនដែលចាញ់របស់ពួកគេនៅក្នុងលីគក្នុងរដូវកាលនេះបានដដែល។
Suarez និង Cristiano Ronaldo ស៊ុតបញ្ចូលទីម្នាក់មួយគ្រាប់នៅនាទីទី ១០ និងទី ១៤ មុនពេល Lionel Messi ជួយឲ្យ Barcelona នាំមុខវិញ ហើយ Gareth Bale ក៏បានជួយឲ្យក្រុមភ្ញៀវតាមស្មើវិញនៅចុងម៉ោង ៕
ដោយ៖តារា
