ក្លិប Pahang FA បានសម្រេចចែកផ្លូវគ្នាជាមួយខ្សែប្រយុទ្ធ ចាន់ វឌ្ឍនាកា ក្រោយរួមរស់បានជាងកន្លះឆ្នាំ។
មូលហេតុចម្បងដែលជម្រុញឲ្យក្លិបធ្វើបែបនេះគឺ ដើម្បីទិញកីឡា Issey Nakajima មកបំពេញតំបន់ប្រយុទ្ធខាងលើ។ វឌ្ឍនាកា ថ្វីបើត្រូវបានគេមើលឃើញល្អនៅតំបន់បម្រើដែលគ្រូដាក់ឲ្យលេង ប៉ុន្តែនៅមិនគ្រប់គ្រាន់តាមអ្វីដែល Pahang ត្រូវការ។ ការទាមទារខ្ពស់បែបនេះគឺដោយសារ កីឡាករប្រាក់ខែខ្ពស់ជាងគេទី២ក្នុងក្លិបរូបនេះ ស្ថិតក្នុងកូតាកីឡាករបរទេស ដែលដាច់ខាតត្រូវតែល្អខ្លាំង ជាងកីឡាករក្នុងស្រុក។
បេក្ខភាពជំនួសមកវិញគឺ ខ្សែប្រយុទ្ធសញ្ជាតិកាណាដា Issey Nakajima ដែលកំពុងលេងឲ្យ Terengganu FA បាន៦១ប្រកួត និងស៊ុតបាន៣២គ្រាប់។
វឌ្ឍនាកា ជាកីឡាករកម្ពុជាទី២ ដែលចាកចេញពីម៉ាឡេស៊ី បន្ទាប់ពី PKNP បញ្ចប់កុងត្រា កែវ សុខផេង កាលពីពេលថ្មីៗនេះ។ ក្រៅពីនេះ កៅអី ប្រាក់ មុន្នីឧត្តម នៅក្លិបបាតតារាង Negeri Sembilan ក៏កំពុងក្តៅផងដែរ ៕
ដោយ៖តារា
