Neymar កំពុងស្ថិតក្នុងរដូវកាលទីមួយរបស់គេនៅ Paris Saint-Germain ក្រោយពីផ្ទេរចេញពី Barcelona ក្នុងតម្លៃខ្លួន ២២២ លានអឺរ៉ូ។ ទោះជាយ៉ាងណាក៏ដោយ ចាប់តាំងពីពេលនោះមក មានពាក្យចចាមអារ៉ាមជាច្រើនបានលេចឡើងពាក់ព័ន្ធនឹងការវិញត្រឡប់ទៅកាន់អេស្ប៉ាញវិញរបស់គាត់ ខណៈមានរបាយការណ៍មួយចំនួនបានលើកឡើងថា គាត់មានការលំបាកក្នុងការរស់នៅក្នុងប្រទេសបារាំង។
ប៉ុន្តែគ្រូបង្វឹករបស់ Real Madrid លោក Zidane បានបដិសេធមិនប្រាប់ថាតើកីឡាករសញ្ជាតិប្រេស៊ីលរូបនេះស្ថិតនៅក្នុងកែវភ្នែករបស់គាត់ដែរឬយ៉ាងណានោះ។
យោងតាមសារព័ត៌មាន Express គ្រូបង្វឹក Zidane បាននិយាយថា៖ “គាត់មិនមែនជាកីឡាកររបស់ខ្ញុំទេ។ ខ្ញុំនឹងមិននិយាយអំពីរឿងនោះឡើយ។ ខ្ញុំគ្រាន់តែផ្តោតលើការបញ្ចប់រដូវកាលនេះឲ្យបានល្អប៉ុណ្ណោះ “។
Real Madrid ហាក់ធ្លាក់ទម្រង់លេងនៅក្នុងស្រុកនៅរដូវកាលនេះ ដោយបណ្ដោយឲ្យពាន La Liga ធ្លាក់ទៅក្នុងដៃរបស់ Barcelona ខណៈមិនទាន់ទាំងចប់រដូវកាលផង ហើយថែមទាំងត្រូវខ្ទាត់ចេញពីការប្រកួតវគ្គប្រាំបីក្រុមចុងក្រោយនៅ Copa del Rey ក្រោមថ្វីជើងរបស់ Leganes ទៀតផង។
ទោះបីជាយ៉ាងណាក៏ដោយ ពួកគេអាចឈានដល់វគ្គផ្តាច់ព្រ័ត្រនៃក្របខណ្ឌ Champions League ដែលពួកគេនឹងត្រូវជួបជាមួយ Liverpool នៅថ្ងៃទី ២៦ ខែឧសភានេះ ៕
ដោយ៖តារា
