ថ្នាក់ដឹកនាំអាស៊ាន នឹងពិនិត្យសម្រេចទៅលើឯកសារសរុបចំនួន ៤៤ ដែលត្រូវពិនិត្យសម្រេចក្នុងកិច្ចប្រជុំកំពូលអាស៊ានលើកទី៣៥ នៅទីក្រុងបាងកក ប្រទេសថៃ ក្នុងនោះ មានឯកសារចំនួន ១៥ ដែលត្រូវអនុម័តជាឯកច្ឆន្ទ ឯកសារចំនួន ១៣ ត្រូវសម្រេចឱ្យចេញផ្សាយ និងឯកសារចំនួន ១១ ដែលមេដឹកនាំអាស៊ានត្រូវធ្វើការកត់សម្គាល់ ។ នេះបើយោងតាមការឱ្យដឹង របស់ឯកឧត្ដម ស្រ៊ី ថាមរង្គ រដ្ឋមន្ត្រីប្រតិភូអមនាយករដ្ឋមន្ត្រី ។
ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាល ចាកចេញពីកម្ពុជាហើយ នាព្រឹកថ្ងៃទី០២ ខែវិច្ឆិកា ឆ្នាំ២០១៩ តាមជើងយន្តហោះពិសេស ដើម្បីទៅចូលរួមចូលរួមកិច្ចប្រជុំកំពូលអាស៊ានលើកទី៣៥ និងកិច្ចប្រជុំពាក់ព័ន្ធ ក្រោមប្រធានបទ «ជំរុញភាពជាដៃគូសម្រាប់ចីរភាព» ដែលប្រព្រឹត្តទៅនៅទីក្រុងបាងកក ព្រះរាជាណាចក្រថៃ ពីថ្ងៃទី០២ ដល់ថ្ងៃទី០៥ ខែវិច្ឆិកា ឆ្នាំ២០១៩ ដែលជាការឆ្លើយតបតាមការអញ្ជើញរបស់ ឯកឧត្ដម ប្រាយុទ្ធ ច័ន្ទអូចា នាយករដ្ឋមន្ត្រីនៃព្រះរាជាណាចក្រថៃ ។
ស្របពេល កិច្ចប្រជុំកំពូលអាស៊ានលើកទី៣៥នេះ សម្តេចតេជោនាយករដ្ឋមន្រ្តី ក៏នឹងអញ្ជើញចូលរួម ក្នុងកិច្ចប្រជុំ និងកម្មវិធីមួយចំនួនផ្សេងទៀត ដូចជា ជំនួបរវាងប្រមុខរដ្ឋរដ្ឋាភិបាលអាស៊ានបូកបី និងក្រុមប្រឹក្សាពាណិជ្ជកម្មអាស៊ីបូព៌ា អាហារថ្ងៃត្រង់ពិសេសស្តីពីការអភិវឌ្ឍប្រកបដោយចីរភាព និងកិច្ចប្រជុំកំពូលមេគង្គ-ជប៉ុន លើកទី១១ (អាហារការងារពេលល្ងាច) ។ ជាមួយគ្នានេះដែរ សម្តេចតេជោ ហ៊ុន សែន ក៏នឹងជួបពិភាក្សាការងារជាមួយនាយករដ្ឋមន្ត្រីចិន និងនាយករដ្ឋមន្ត្រីរុស្ស៊ី ហើយគ្រោងនឹងមានជំនួបទ្វេភាគី ជាមួយថ្នាក់ដឹកនាំ និងឥស្សរជនមកពីប្រទេសជាសមាជិកអាស៊ាន និងប្រទេសដៃគូសន្ទនាអាស៊ានផងដែរ។ សម្តេចតេជោ នឹងអញ្ជើញចូលរួមកម្មវិធីអាហារការងារពេលព្រឹកជាមួយឯកឧត្តម ង្វៀន សួនហ៊ុក នាយករដ្ឋមន្រ្តី វៀតណាម និងឯកឧត្តម ថងលូន ស៊ីស៊ូលីត នាយករដ្ឋមន្រ្តីឡាវ ។
គួរបញ្ជាក់ដែរថា គណៈប្រតិភូជាន់ខ្ពស់នៃរាជរដ្ឋាភិបាលកម្ពុជា ដឹកនាំដោយប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន គ្រោងនឹងធ្វើមាតុភូមិនិវត្តន៍ មកកាន់កម្ពុជាវិញនៅថ្ងៃទី០៥ ខែវិច្ឆិកា ឆ្នាំ២០១៩ ៕
ដោយ៖ ស្រស់
