Manchester City បានធ្វើព្យុះធ្វើភ្លៀងយ៉ាងខ្លាំងនៅក្របខ័ណ្ឌ Premier League ក្នុងរដូវកាលនេះ ហើយបានបំបែកកំណត់ត្រាមួយចំនួនផងដែរ នៅពេលដែលពួកគេឆ្ពោះទៅកាន់តំណែងជើងឯក។ ពួកគេទទួលបានពិន្ទុច្រើនជាងគេ (១០០ ពិន្ទុ) រកគ្រាប់បាល់បានច្រើនជាងគេ (១០៦ គ្រាប់) បានទទួលជ័យជម្នះច្រើនជាងគេ (៣២ លើក) ព្រមទាំងឈ្នះពាននៅលីគដោយមានពិន្ទុលើសគេរហូតដល់ (១៩ ពិន្ទុ) ដែលមិនធ្លាប់មានពីមុនមក។
ស្របពេលដែលរដូវកាលនេះបានបញ្ចប់ជាស្ថាពរហើយនោះ Man City ក៏ បាន រៀបចំក្បួន ដង្ហែរ ពានតាមរថយន្តក្រុងកាលពីថ្ងៃចន្ទនេះ ដើម្បីបង្ហាញអំពីការកោតសរសើររបស់ពួកគេដល់អ្នកគាំទ្ររបស់ក្លឹប។
នៅចុងបញ្ចប់ការដង្ហែនេះ Guardiola បានប្រាប់ទៅហ្វូងអ្នកគាំទ្រថា៖ “ឥឡូវនេះជាពេលដែលត្រូវរីករាយនឹងអ្វីដែលយើងសម្រេចបាននៅរដូវកាលនេះ។ វាមិនមែនជាពេលដែលត្រូវនិយាយអំពីគម្រោងនៅរដូវកាលក្រោយនោះទេ។ នៅរដូវក្តៅនេះ យើងនឹងអង្គុយលើសាឡុងទស្សនាការប្រកួត World Cup ដោយរីករាយ ហើយយើងនឹងទទួលទានស្រាបៀឆ្ងាញ់ៗ ស្រាក្រហមល្អៗ ព្រមទាំងរីករាយនឹងជោគជ័យដែលយើងសម្រេចបាន។ បន្ទាប់មក យើងនឹងព្យាយាមត្រឡប់មកវិញ ហើយបន្តធ្វើព្យុះធ្វើភ្លៀងកាន់តែខ្លាំងជាងឆ្នាំមុនទៀត”។
What a night! 🏆💙 #CENTURIONS #mancity pic.twitter.com/sKPTTkUxwt
— Manchester City (@ManCity) May 15, 2018
មានអ្នកក្រុមគាំទ្រប្រហែល ១០០.០០០ នាក់បានឈរតាមដងផ្លូវ នៅពេលដែលរថយន្តក្រុងរបស់ក្លឹបបានចាប់ផ្តើមចេញដំណើរពី Manchester Cathedral ទៅកាន់ Deansgate មុនពេលឆ្លងកាត់ Albert Square និងសាលាក្រុង ៕
ដោយ៖តារា
