ប្រតិភូទេសចរណ៍ Caravan Tour ពេញចិត្តចំពោះបដិសណ្ឋារកិច្ចរបស់កម្ពុជា ក្នុងពេលស្នាក់នៅ៩ថ្ងៃ

36896
  • ប្រតិភូទេសចរណ៍នៃក្បួនរថយន្ត Caravan Tour 2019 ដែលមានទាំងភ្ញៀវទេសចរមកពីចិន ឡាវ រួមទាំងកម្ពុជាផងនោះ បានបង្ហាញនូវការពេញចិត្តចំពោះការទទួលបដិសណ្ឋារកិច្ចរបស់ព្រះរាជាណាចក្រកម្ពុជា នាកំលុងពេលស្នាក់នៅ និងធ្វើដំណើរទស្សនាកម្សាន្តនៅកម្ពុជា អស់រយៈពេល ៩ ថ្ងៃកន្លងមក ។

    ក្បួនរថយន្ត Caravan Tour នេះបានធ្វើដំណើរចេញពីកម្ពុជាតាមច្រកព្រំដែនអន្ដរជាតិត្រពាំងគ្រៀល ខេត្តស្ទឹងត្រែង ចូលទៅប្រទេសឡាវ នាថ្ងៃទី៣ ខែធ្នូ ឆ្នាំ២០១៩ ដើម្បីវិលត្រឡប់ទៅសាធារណរដ្ឋប្រជាមានិតចិនវិញ ។
    កំឡុងពេលស្នាក់នៅ និងទស្សនាកម្សាន្តនៅកម្ពុជា ពួកគេទទួលបានការទទួលបដិសណ្ឋារកិច្ចប្រកបដោយភាពកក់ក្ដៅ ដោយមានការទទួលស្វាគមន៍ពីសំណាក់រដ្ឋមន្ត្រីក្រសួងទេសចរណ៍ ឯកឧត្ដម ថោង ខុន តំណាងរដ្ឋបាលរាជធានី-ខេត្ត ដូចទៅនឹងយុទ្ធនាការ «កម្ពុជា៖ ព្រះរាជាណាចក្រអច្ឆរិយៈ ផ្ដល់ភាពកក់ក្ដៅ»។
    ក្បួនរថយន្ដខាងលើបានធ្វើដំណើរចេញទីក្រុងគុនមិញ ខេត្តយូណាន ប្រទេសចិន ឆ្លងកាត់ប្រទេសឡាវចូលមកប្រទេសកម្ពុជា ដូចទៅនឹងទឹកហូរពីទន្លេឡានឆាងចូលទន្លេមេគង្គ ដែលជាការផ្សព្វផ្សាយផ្លាស់ប្ដូរទេសចរណ៍ និងវប្បធម៌ក្នុងក្របខណ្ឌទន្លេឡានឆាង-ទន្លេមេគង្គ ដើម្បីអបអរសាទរឆ្នាំវប្បធម៌ និងទេសចរណ៍កម្ពុជា-ចិន ២០១៩។ ពួកគេបានចូលរួមផ្សព្វផ្សាយពីសក្ដានុពលទេសចរណ៍វប្បធម៌របស់កម្ពុជាទៅកាន់ប្រទេសចិន និងសកលលោកផងដែរ ។

    គួរបញ្ជាក់ថា ពិធីបើកជាផ្លូវការនៃពីធីបើកចេញដំណើរក្បួនរថយន្ត Caravan Tour 2019 ត្រូវបានធ្វើឡើងនាថ្ងៃទី១៦ ខែវិច្ឆិកា ឆ្នាំ២០១៩ ក្រោមអធិបតីភាពលោក ឡ ស៊ូកាង រដ្ឋមន្រ្តីក្រសួងវប្បធម៌ និងទេសចរណ៍នៃសាធារណរដ្ឋប្រជាមានិតចិន អភិបាលខេត្តគុនមិញ លោក YU ChengFa និងឯកឧត្ដម ហោ សារុន អនុរដ្ឋលេខាធិការក្រសួងទេសចរណ៍កម្ពុជា និងជាតំណាងឯកឧត្ដមរដ្ឋមន្រ្តី ថោង ខុន នៅទីក្រុងគុនមិញ ខេត្តយូណាន ។
    ចំណែកឯពិធីបិទជាផ្លូវការនៃក្បួនរថយន្ដ Caravan Tour 2019 នេះ គឺធ្វើឡើងនាថ្ងៃទី៣០ ខែវិច្ឆិកា ឆ្នាំ២០១៩ ក្រោមអធិបតីភាពឯកឧត្ដម ហោ សារុន នៅសណ្ឋាគារសុខាសៀមរាប ខេត្តសៀមរាប និងមានការចូលរួមពីស្ថាប័នពាក់ព័ន្ធមួយចំនួនទៀត ដូចជាសមាគមទីភ្នាក់ងារទេសចរណ៍ (CATA) សមាគមទេសចរណ៍អាស៊ីប៉ាស៊ីហ្វិក (PATA) ក្រុមហ៊ុនទេសចរណ៍ និងមន្ទីរទេសចរណ៍ខេត្តសៀមរាប ៕

    ដោយ៖ រ៉ាយូ

  • ភ្ជាប់ទំនាក់ទំនងជាមួយ Merl Plus
  • អត្ថបទថ្មី