ក្លឹប បឹងកេត អ៊ែបស៊ី បានក្លាយជាម្ចាស់ពានលីគកំពូលកំពូលកម្ពុជាចំនួន ៣ រដូវកាលរួចមកហើយ ក្រោយពីប្រើពេលវេលាអស់ ៦ រដូវកាលរួចមក ។
ក្លឹប បឹងកេត មិនទាន់ស្គាល់រសជាតិលើកពានរង្វាន់ ហ៊ុនសែនខាប់ ដែលប្រើប្រាស់កីឡាករខ្មែរសុទ្ធនោះឡើយ ចាប់តាំងពីក្លឹបនេះបានបង្កើតឡើងមក ។ លោក ហៅ សុជាតិ គ្រូបង្វឹករបស់ក្លឹប បឹងកេត មិនរំពឹងថាក្រុមរបស់លោកអាចនិងលើកពានរង្វាន់នេះបាននោះទេ ប៉ុន្តែលោកសង្ឃឹមថាក្រុមរបស់លោកយ៉ាងហោចណាស់ក៏ឡើងដល់វគ្គពាក់កណ្ដាលផ្ដាច់ព្រ័ត្រដែរនៅឆ្នាំនេះ ។
លោក ហៅ សុជាតិ បាននិយាយថា៖” ជើងឯកពានរង្វាន់សម្ដេចហ៊ុនសែនយើងចេះតែចង់បានហើយ ប៉ុន្តែមកដល់ពេលនេះបើយើងក្រឡេកមើលកីឡាកររបស់យើងនៅមានកម្រិត ដោយសារកីឡាករមួយចំនួនមានវ័យកាន់តែចាស់ រីឯកីឡាករវ័យក្មេងមួយចំនួនខ្វះបទពិសោធច្រើន ។ ទោះជាយ៉ាងណាយើងនិងព្យាយាមឲ្យមានលទ្ធផលល្អ ទោះបីបើមិនបានជើងឯក យ៉ាងហោចណាស់ក៏ឲដល់ត្រឹមវគ្គពាក់កណ្ដាលផ្ដាច់ព្រ័ត្រដែរ”។
គួឲ្យដឹងផងដែរថា វគ្គ ១៦ ក្រុមចុងក្រោយថ្នាក់ជាតិ ជើងទីមួយនិងធ្វើឡើងនៅថ្ងៃទី ១១ ខែ កក្កដា ខណះ ក្លឹប បឹងកេត ត្រូវប៉ះជាមួយ ក្លឹប វេស្ទើនភ្នំពេញ ៕
ដោយ៖តារា
