ចំនួនអ្នកស្លាប់ដោយសារការឆ្លងកូរ៉ូណាវីរុសប្រភេទថ្មី បានកើនឡើងដល់ ២១៣ នាក់ហើយ ក្នុងប្រទេសចិន ខណះខេត្ត Hubei បានរាយការណ៍ថា មានអ្នកស្លាប់ ៤២នាក់ថ្មី នេះគិតត្រឹមព្រឹកថ្ងៃសុក្រ ទី៣១ ខែមករានេះ ។
ក្រសួងសុខាភិបាលខេត្ត Hubei បានប្រកាសថា អ្នកស្លាប់ព្រោះជម្ងឺរលាកសួតដែលបង្កឡើងដោយមេរោគកូរ៉ូណាវីរុសថ្មី បានកើនឡើង ៤២ នាក់ថ្មី គិតត្រឹមដំណាច់ថ្ងៃទី៣០ ខែមករា ។ តួលេខនេះ បានធ្វើឲ្យអ្នកស្លាប់សរុបក្នុងខេត្តដែលជាចំណុចផ្តើមនៃការផ្ទុះជម្ងឺនេះ កើនឡើង ២០៤នាក់ហើយ ខណះអ្នកឆ្លងជម្ងឺនេះទូទាំងពិភពលោកបានកើនឡើងដល់ ៩,០០០នាក់ហើយ ។
សូមបញ្ជាក់ឱ្យដឹងថា ចំនួនអ្នកស្លាប់ថ្មីនេះ កើតឡើងប៉ុន្មានម៉ោងប៉ុណ្ណោះអង្គការសុខភាពពិភពលោក (WHO) បានប្រកាសអាសន្នជាសកលអំពីវីរុសដ៏កាចសាហាវនេះ ដែលបានឆ្លងរាលដាលនៅប្រទេសជាច្រើនជុំវិញពិភពលោក រួមមានកម្ពុជាយើងចំនួន ១ ករណីផងដែរ ៕
ដោយ៖ រ៉ាយូ
