សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា ជំងឺកូរ៉ូណាថ្មីមិនទាន់ឆ្លងដល់ពលរដ្ឋខ្មែរណាម្នាក់នោះទេ បន្ទាប់បុរសជនជាតិចិនម្នាក់ ដែលមកពីទីក្រុងវូហានប្រទេសចិនមានផ្ទុកវីរុសនេះ ត្រូវបានព្យាបាលជាសះស្បើយ និងអនុញ្ញាតឱ្យត្រឡប់ទៅប្រទេសកំណើតវិញនៅថ្ងៃទី១១ ខែកុម្ភៈ ឆ្នាំ២០២០នេះ ។
ក្នុងពិធីបើកការដ្ឋានគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ២ (ពីរង្វង់មូលតាខ្មៅដល់អូរចំបក់) និងផ្លូវជាតិលេខ២២ (ពីអូរចំបក់ ដល់អង្គតាសោម) នាព្រឹកថ្ងៃទី១១ ខែកុម្ភៈ ឆ្នាំ២០២០ នៅក្នុងខណ្ឌដង្កោរ រាជធានីភ្នំពេញ សម្ដេចតេជោ ហ៊ុន សែន បានមានប្រសាសន៍ថា មកដល់ម៉ោងនេះ ករណីជំងឺកូរ៉ូណាត្រូវបានបញ្ចប់នៅកម្ពុជា ដោយសារនជាតិជាតិចិនដែលមកពីក្រុវវូហាន ប្រទេសចិន គាត់បានចេញពីមន្ទីពេទ្យខេត្ត ព្រះសីហនុកាលពីថ្ងៃទី១១ ខែកុម្ភៈ ឆ្នាំ២០២០ ហើយតាមគម្រោងថ្ងៃនេះ គាត់នឹងចាកចេញពីកម្ពុជាទៅប្រទេសចិនវិញ ។ ដូច្នេះបញ្ហាពិតប្រាកដគឺជាអ្វី នោះគឺជំងឺកូរ៉ូណាមិនទាន់ឆ្លងដល់ពលរដ្ឋខ្មែរណាម្នាក់ទាល់តែសោះ ប៉ុន្តែបែរជានាំគ្នាភ័យខ្លាច ក្រោយការបំពុលព័ត៌មានរបស់ពួកអគតិ ឬពួកខិលខូច ។
សម្ដេចតេជោក៏បានថ្លែងឱ្យដឹងដែរថា ពិតហើយនៅព្រឹកនេះអភិបាលខេត្តព្រះសីហនុ បានធ្វើរបាយការណ៍មកថា យើងមានកាប៉ាល់ទេសចរណ៍ចូលមកខេត្តព្រះសីហនុ ហើយមានមួយករណីជនជាតិហូឡង់ម្នាក់គាត់ក្ដៅខ្លួន។ សម្ដេចតេជោបានបញ្ជាក់ថា៖ “ឥឡូវយើងកំពុងយកមកដាក់ឱ្យមានការព្យាបាល ដោយយើងបបានយកសំណាកមកពិនិត្យនៅវិទ្សាស្ថានប៉ាស្ទ័រ ដែលយើងកំពុងរង់ចាំអំពីការធ្វើពិសោធន៍លើសំណាក់នេះ ដើម្បីស្វែងរកប្រភេទជំងឺ ថាតើមានកូរ៉ណាថ្មី ឬមួយក៏អត់។ បើមានកូរ៉ណាជនជាតិហូឡង់ម្នាក់នេះ ត្រូវតែនៅព្យាបាលនៅក្នុងប្រទេសកម្ពុជា រហូតដល់ជាសះស្បើយ”។ សម្ដេចតេជោនាយករដ្ឋមន្ត្រីលើឡើងថា នេះក៏ជាគោលការណ៍ដែលយើងចាប់ផ្ដើមមាន តាំងពីមានជំងឺសា បានផ្ទុះឡើងកាលពីឆ្នាំ២០០៣ ដែលពេលនោះកម្ពុជាធ្វើជាប្រធានអាស៊ាន យើងមានគំនិតផ្ដួចផ្ដើមប្រជុំអាស៊ានបន្ទាន់មួយនៅទីក្រុងបាងកក ដោយថៃធ្វើជាម្ចាស់ផ្ទះ តែកម្ពុជាធ្វើជាប្រធាន ដែលគោលការណ៍នៅពេលនោះ ប្រសិនបើរកឃើញថាជំងឺនេះវាកើតនៅក្នុងប្រទេសណា ប្រទេសនោះត្រូវតែព្យាបាលឱ្យជាមុនពេលឱ្យអ្នកជំងឺនេះចាកចេញ។ ដូច្នេះយើងកំពុងរង់ចាំពិនិត្យមើលជនជាតិហូឡង់ម្នាក់នេះ ដែលឥឡូវគាត់កំពុងព្យាបាលនៅឯមន្ទីរពេទ្យខេត្តព្រះសីហនុ។ សម្តេចតេជោ ហ៊ុន សែន ក៏បានកោតសរសើរចំពោះរដ្ឋមន្ត្រីក្រសួងសុខាភិបាលកម្ពុជា ដែលបានយកចិត្តទុកដាក់ ពីបញ្ហាសុខទុក្ខរបស់ជនជាតិចិនម្នាក់ តាំងពីទទួលព័ត៌មានថាមានផ្ទុកវីរុស កូរ៉ូណាថ្មី រហូតបានជាសះស្បើយពីវីរុសនេះវិញ រហូតទទួលស្វាគមន៍ដោយផ្ទាល់ក្រោយពីបុរសជនជាតិចិននេះ បានចេញពីមន្ទីរពេទ្យបង្អែកខេត្តព្រះសីហនុ។
សម្តេចតេជោបានចាត់ទុកថា នេះជាកាយវិការយកចិត្តព្យាបាលអ្នកជំងឺដោយវីរុសកូរ៉ូណាថ្មីនេះ នៅក្នុងប្រទេសកម្ពុជាឱ្យជាសះស្បើយផងដែរ ។
គូសបញ្ជាក់ថា លោក ចា ជិនហូរ អាយុ ៦០ឆ្នាំ បានធ្វើដំណើរមកពីទីក្រុងវូហាន ជាមួយក្រុមគ្រួសារ ៣នាក់ទៀត មកដល់ក្រុងព្រះសីហនុ ប្រទេសកម្ពុជា កាលពីថ្ងៃទី២៣ ខែមករា ឆ្នាំ២០២០។ បន្ទាប់ពីមកដល់ រយៈពេល២ថ្ងៃ លោកមានអាការៈក្អក ក្តៅខ្លួនខុសធម្មតា ហើយត្រូវបានមន្រ្តីសុខាភិបាល យកសំណាកបំពង់កទៅពិនិត្យឃើញថា គាត់មានជំងឺរលាកផ្លូវដង្ហើមប្រភេទថ្មីកូរ៉ូណា នៅថ្ងៃទី២៧ ខែមករា ឆ្នាំ២០២០ ព្រមទាំងដាក់ឱ្យសម្រាកព្យាបាល នៅមន្ទីរពេទ្យបង្អែក ខេត្តព្រះសីហនុ។
ជាមួយគ្នានេះ ក្រសួងសុខាភិបាល បានបញ្ជាក់ផងដែរថា សម្រាប់ក្រុមគ្រួសាររបស់បុរសជនជាតិចិនរូបនេះ ៣នាក់ផ្សេងទៀត ក៏ត្រូវបានអនុញ្ញាតឱ្យត្រឡប់ទៅវិញជួបជុំគ្រួសារ ក្រោយពីពួកគេត្រូវបានតាមដាន និងរកឃើញថា ពុំមានរោគសញ្ញាវីរុសកូរ៉ូណា រហូតមកដល់ថ្ងៃនេះ ៕
ដោយ៖ សំណាង
