ប្រទេសស្វ៊ីស នៅតែបន្តផ្ដល់ជំនួយដល់មន្ទីរពេទ្យគន្ធបុប្ជារយៈពេល៣ឆ្នាំទៀតចំនួន១២លានដុល្លារ

15029
  • ឯកអគ្គរដ្ឋទូតថ្មី នៃប្រទេសស្វ៊ីសប្រចាំកម្ពុជាបានគូសបញ្ជាក់ថា រដ្ឋាភិបាលស្វ៊ីស បានបន្ដ​គាំទ្រ​ថវិកាប្រមាណ ១២លានដុល្លារអាម៉េរិក ដល់មន្ទីរពេទ្យគន្ធបុប្ជា សម្រាប់រយៈពេល៣ឆ្នាំ ចាប់ពីឆ្នាំ២០១៩ ដល់ឆ្នាំ២០២១ខាងមុខ​ដើម្បីជួយទ្រទ្រង់ដល់ការព្យាបាលកុមារកម្ពុជា។ នេះ បើតាមការបញ្ជាក់របស់ ឯកឧត្តម កុយ គួង អនុរដ្ឋលេខាធិការ និងជាអ្នកនាំពាក្យក្រសួងការ​បរទេស ក្រោយជំនួបទ្វេភាគីរវាងឯកឧត្តម ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួង​ការបរទេស និងសហប្រតិបត្តិការអន្តរជាតិ ជាមួយលោកជំទាវ ការីន សាលីណូ (Carin SALERNO) ឯកអគ្គរដ្ឋទូតថ្មី នៃប្រទេសស្វ៊ីសប្រចាំកម្ពុជា ដែលមាននិវេសនដ្ឋាន នៅទីក្រុង​បាង​កក ប្រទេសថៃ កាលពីព្រឹកថ្ងៃទី១២ ខែកុម្ភៈ ឆ្នាំ២០២០ នៅទីស្ដីការក្រសួងការបរទេស ។

    លោកជំទាវ Carin SALERNO បានគូសបញ្ជាក់ថា ក្រៅពីកិច្ចទំនាក់ទំនងការទូត និង​កិច្ចសហប្រតិបត្តិការយ៉ាងជិតស្និតលើវិស័យជាច្រើនជាមួយកម្ពុជា រដ្ឋាភិបាលស្វ៊ីសបានជួយ​ឧបត្ថម្ភគាំទ្រក្នុងវិស័យសុខាភិបាល ដោយផ្តោតទៅលើការមន្ទីរពេទ្យគន្ធបុប្ផា ដែលគិតចាប់​តាំង​ពីឆ្នាំ១៩៩៤ មកដល់ឆ្នាំ២០១៨ រដ្ឋាភិបាលប្រទេសស្វ៊ីស បានគាំទ្រដល់មន្ទីរពេទ្យ​គន្ធបុប្ផា គិតជាថវិកាប្រមាណជា៦០លានដុល្លារអាម៉េរិក។ លោកជំទាវបានបន្ដថា រដ្ឋាភិ​បាលស្វ៊ីសបានផ្ដោតសំខាន់ទៅលើវិស័យសុខាភិបាលដែលជួយទៅលើសុខភាពកុមារ សុវត្ថិ​ភាព​ស្បៀង និងវិស័យកសិកម្ម។ ចំពោះវិស័យសុខាភិបាលនៅកម្ពុជា ស្វ៊ីសនៅតែបន្តគាំទ្រ​ដល់ថវិកាប្រចាំឆ្នាំចំនួន៤លានហ្វ្រង់ស្វីស គឺស្មើនឹង៤លានដុល្លារអាម៉េរិក ក្នុង១ឆ្នាំ ដល់មន្ទីរ ពេទ្យគន្ធបុប្ផា បើទោះបីជាបច្ចុប្បន្ននេះ មន្ទីរពេទ្យគន្ធបុប្ផា ត្រូវបានគ្រប់គ្រងដោយវេជ្ជបណ្ឌិត ជនជាតិខ្មែរក៏ដោយ។ ក្រៅពីនេះ រដ្ឋាភិបាលស្វ៊ីស បានផ្ដល់ការបណ្ដុះបណ្ដាល​ដល់មន្ត្រី​កសិកម្ម និងផ្នែកបដិសណ្ឋារកិច្ចទទួលភ្ញៀវទេសចរ និងផ្ដល់ជំនួយសម្រាប់វិស័យដោះមីន ពីឆ្នាំ២០២០-២០២៥ នូវថវិកាចំនួន៦លានដុល្លារបន្ថែមទៀត តាមផែនការកម្ពុជា​នឹងបញ្ចប់ការ​ដោះ​មីននៅឆ្នាំ២០២៥ខាងមុខ ដែលកម្ពុជាប្រកាសថា នឹងគ្មានគ្រាប់មីន។ លោកជំទាវឯក​អគ្គរដ្ឋទូតបានបន្ថែមថា រដ្ឋាភិបាលស្វ៊ីស បានផ្ដល់ជំនួយលើអភិបាលកិច្ចល្អ និងវិមជ្ឈការ​ដោយ​មានកិច្ចសហការជាមួយនឹងក្រសួងមហាផ្ទៃ ។

    ឯកឧត្តមឧបនាយករដ្ឋមន្ត្រី ប្រាក់ សុខុន បានថ្លែងអំណរគុណដល់រដ្ឋាភិបាលស្វ៊ីស​ដែលបានផ្តល់ជំនួយដល់វិស័យបោសសម្អាតមីននៅកម្ពុជា និងជំនួយអភិវឌ្ឍន៍​ជាច្រើនទៀត​នៅ​កម្ពុជា ព្រមទាំងបានបន្តនិងជំរុញបង្កើនទំហំពាណិជកម្ម នៃប្រទេសទាំងពីរឱ្យកាន់តែល្អ​ប្រសើរ នៅក្នុងឆ្នាំ២០២០នេះ។ ឯកឧត្ដមឧបនាយករដ្ឋមន្រ្ដីបានលើកឡើងថា តាមរយៈ​លោកជំទាវឯកអគ្គរដ្ឋទូត នឹងដឹកនាំអ្នកធុរកិច្ច ជាប្រធានក្រុមហ៊ុនធំៗរបស់ស្វ៊ីសមកសិក្សា​ពីសក្តានុពលវិនិយោគនៅកម្ពុជា និងជំរុញទេសចរស្វ៊ីស មកកម្ពុជា ដើម្បីឱ្យកម្ពជាបន្តមាន​កំណើនសេដ្ឋកិច្ច សម្រាប់ជាផលប្រយោជន៍ប្រជាជននិងប្រទេសទាំងពីរ ៕

    ដោយ៖ សំណាង

    ភ្ជាប់ទំនាក់ទំនងជាមួយ Merl Plus
  • អត្ថបទថ្មី