លោក Jurgen Klopp បានបង្ហើបប្រាប់ថា លោកមិនមានគម្រោងនឹងប្ដូរទៅដឹកនាំក្លឹបនៅក្នុងលីគកំពូលអ៊ីតាលីក្នុងពេលដ៏ខ្លីខាងមុននេះនោះទេ ។ អ្នកចាត់ការដែលមានវ័យ ៥២ឆ្នាំរូបនេះទទួលបានជោគជ័យខ្លាំងចាប់តាំងពីពេលដែលលោកបានប្ដូរមកកាន់តួនាទីដឹកនាំក្លឹប Liverpool ជំនួសលោក Brendan Rodgers កាលពីរដូវក្ដៅឆ្នាំ២០១៥ ។
ចាប់តាំងពីពេលនោះមក លោក Klopp បានដឹកនាំ Liverpool ឱ្យក្លាយជាម្ចាស់តំណែងជើងឯក Champions League កាលពីឆ្នាំ២០១៩ ហើយបច្ចុប្បន្នពួកគេកំពុងស្ថិតលើដំណើរផ្លូវឆ្ពោះទៅរកតំណែងជើងឯកលីគកំពូលអង់គ្លេសដំបូងរបស់ខ្លួនក្នុងរយៈពេល ៣ទសវត្សរ៍ ក្រោយរក្សាបានគម្លាត ២៥ពិន្ទុនាំមុខក្លឹប Manchester City ដែលកំពុងឈរនៅលំដាប់ទី២ ។
ពេលផ្ដល់បទសម្ភាសន៍ឱ្យប្រព័ន្ធផ្សព្វផ្សាយ Radio Anch’io Sport លោក Klopp បាននិយាយថា លោកមិនមានគម្រោងប្ដូរទៅដឹកនាំនៅលីគកំពូលអ៊ីតាលីក្នុងពេលអនាគតនោះទេ ហើយមូលហេតុចម្បងនោះ គឺបញ្ហាភាសា ។
អតីតគ្រូ Borussia Dortmund រូបនេះបានរៀបរាប់ថា៖ “ខ្ញុំនឹងមិនប្ដូរទៅដឹកនាំក្លឹបនៅអ៊ីតាលីនោះទេ ព្រោះខ្ញុំចង់ដើរកម្រាន្តក្រោយចប់អាជីពរបស់ខ្ញុំ។ ខ្ញុំត្រូវការស្រាល្អមួយកែវ ខ្ញុំនឹងរីករាយជាមួយលោក Arrigo Sacchi ឬជួបជាមួយលោក Carlo Ancelotti ឬលោក Maurizio Sarri ។ ខ្ញុំចូលចិត្តប្រទេសរបស់អ្នក ទាំងមានធាតុអាកាសល្អ ទាំងមានអាហារឆ្ងាញ់ៗ ។ ប៉ុន្តែបើទៅធ្វើការនៅទីនោះ ខ្ញុំត្រូវចេះភាសា ហើយភាសាអ៊ីតាលីរបស់ខ្ញុំមិនសូវល្អទេ ។ ខ្ញុំត្រូវការពេលយ៉ាងហោចណាស់មួយឆ្នាំដើម្បី រៀនភាសាអ៊ីតាលី បន្ទាប់មកទើបខ្ញុំអាចគិតដល់រឿងនេះបាន មានអ្នកណាអាចដឹងមុននោះ ។ នៅថ្ងៃឈប់សម្រាក ខ្ញុំនឹងមកទីនេះ ប៉ុន្តែបើមកធ្វើជាអ្នកចាត់ការវិញ មាននរណាអាចថាបានមុនទៅ ” ៕
ដោយ៖ តារា
