Robin Van Persie បាននិយាយក្នុងអំឡុងពេលប្រកួតដែល Arsenal ប្រកួតឈ្នះក្លឹប Olympiacos ក្នុងលទ្ធផល ១ទល់នឹង០ នៅជើងទី១ នៃវគ្គ ១៦ក្រុមចុងក្រោយ ពានរង្វាន់ UEFA Europa League ដែល Lacazette រកបានគ្រាប់បាល់មួយគ្រាប់នេះ។ អតីតកីឡាករក្លឹប Manchester United រូបនេះបានអះអាងថា ផ្នែកខ្សែបម្រើរបស់ Arsenal មិនសូវលេចធ្លោ ហើយកីឡាករដូចជា Granit Xhaka, Matteo Guendouzi និង Joe Willock ពិបាកនឹងបញ្ជូនបាល់ដាច់ឱ្យខ្សែប្រយុទ្ធ ។
លោក Van Persie បាននិយាយប្រាប់សារព័ត៌មាន BT Sport ថា៖ “Arsenal បានបង្កើតឱកាសមួយចំនួន ដូចជាយើងបានឃើញ Lacazette ជាដើម គ្រាប់បាល់នោះគួរតែចំគោលដៅ។ ក្រៅពីនោះ មានឱកាសមួយផ្សេងទៀត ប៉ុន្តែហេតុអ្វីបានជា Arsenal មិនសូវមានឱកាស? ខ្ញុំជឿថា មកពីខ្សែបម្រើ ដោយសារខ្សែប្រយុទ្ធមិនជឿថាពួកគេអាចបញ្ជូនបាល់ទម្លុះមកបាន ” ។
អតីតកីឡាករកាំភ្លើងធំរូបនេះបន្តថា៖ “បើយើងមើល Xhaka, Willock, Guendouzi ពួកគេពិបាកនឹងបញ្ជូនបាល់ផ្ដាច់ឡើងទៅឱ្យខ្សែប្រយុទ្ធបានណាស់ ហើយដោយសារមូលហេតុនេះ បានប៉ះពាល់យ៉ាងខ្លាំងដល់ខ្សែប្រយុទ្ធ ៣រូបនៅខាងលើ ។ ពួកគេតែងតែទន្ទឹងរង់ចាំការបញ្ជូនបាល់ពីខាងក្រោយទៅ ប៉ុន្តែពួកគេមិនសូវបានទទួលដូចបំណងទេ ” ៕
ដោយ៖ តារា
