មន្រ្ដីជាន់ខ្ពស់ក្រសួងទេសចរណ៍បានលើកឡើងថា ម្រេចកំពត គឺជាផលិតផលមួយដែលមានលក្ខណៈពិសេស ពោរពេញទៅដោយសារធាតុសរីរាង្គល្អៗ ហើយក៏ជាគ្រឿងបន្ថែមមានឱជារសឈ្ងុយឆ្ងាញ់ ដែលត្រូវចាត់ជាគ្រឿងបន្សំសម្រាប់ផ្សំជាម្ហូបអាហារនៅក្នុងផ្ទះ ឬភោជនីយដ្ឋាននានាទូទាំងប្រទេស ។ នេះគឺជាការលើកឡើងរបស់ឯកឧត្ដម ហោ មុន្នីរ័ត រដ្ឋលេខាធិការក្រសួងទេសចរណ៍ ក្នុងឱកាសសម្ពោធបើកឱ្យដំណើរការសារមន្ទីរឧបករណ៍កិនម្រេច នៅ La Plantation ក្នុងខេត្តកំពត កាលពីថ្ងៃទី២១ ខែកុម្ភៈ ឆ្នាំ២០២០។
ឯកឧត្ដម ហោ មុន្នីរ័ត បានគូសបញ្ជាក់ថា ម្រេចកំពតជាគ្រឿងផ្សំដ៏សំខាន់មិនអាចខ្វះបានសម្រាប់មុខម្ហូបទូទៅប្រចាំតំបន់ និងម្ហូបពិសេសៗរបស់ពលរដ្ឋកម្ពុជា ដូចជា ឆាក្តាម មឹកបំពង និងបង្គារឆាជាមួយម្រេចខ្ចី ឬឆាឡុកឡាក់ សាច់គោជាមួយនឹងទឹកម្រេចដែលមានបីប្រភេទ គឺ ម្រេចខ្មៅ ម្រេចស និងម្រេចក្រហម។ ឯកឧត្ដមរដ្ឋលេខាធិការក៏បានលើកពីប្រវត្តិសាស្ត្រ ដើម្បីឱ្យយើងឈ្វេងយល់ពីការប្រើប្រាស់ ឧបករណ៍កិនម្រេចផ្សេងៗគ្នា នៅជុំវិញពិភពលោក ថ្វីបើវាជាឧបករណ៍ដែលមានភាពពិសេសប្លែកគ្នាក៏ដោយ ប៉ុន្តែឧបករណ៍កិនម្រេចទាំងនោះសុទ្ធតែបានផ្តល់នូវអត្ថប្រយោជន៍យ៉ាងសំខាន់ សម្រាប់បម្រើសេចក្តីត្រូវការដល់អ្នកប្រើប្រាស់របស់មនុស្សនៅទូទាំងពិភពលោក ។
បើតាមការលើកឡើងរបស់ លោក ភូ លិ អភិបាលរងខេត្តកំពត បានឱ្យដឹងថា ខេត្តកំពតជាខេត្តមួយមានសក្តានុពលប្រកបដោយការរីកចម្រើនលើគ្រប់វិស័យទាំងសេដ្ឋកិច្ច ទាំងវិស័យទេសចរណ៍ ពិសេសវិស័យកសិកម្ម ឧស្សាហកម្ម ដោយខេត្តកំពតមានរោងចក្រផលិតស៊ីម៉ងត៍ចំនួន៤ ដែលកំពុងដំណើរការផលិតស៊ីម៉ងត៍រាប់លានតោនក្នុងមួយឆ្នាំៗ មានដំណាំម្រេចដែលមានការទទួលស្គាល់ជាលក្ខណៈអន្តរជាតិ និងជាទំនិញម្ចាស់ភូមិសាស្ត្រ(GI) មានស្រែអំបិលរាប់ពាន់ហិកតា។ ជាមួយគ្នានេះ ខេត្ដក៏មានផលិតផលថ្មីមួយទៀតគឺផលិតផលផ្កាអំបិល ហើយផលនេសាទសមុទ្រក៏ជាផលិតផលមានសក្តានុពលរបស់ខេត្តយ៉ាងសំខាន់ផងដែរ។ លើសពីនេះទៀត ខេត្តកំពតក៏មានផ្លែទុរេន ដែលមានរសជាតិឈ្ងុយឆ្ងាញ់ ហើយភោគផលកសិកម្មដូចជា ដូង ស្វាយ ស្រូវ ក៏មានច្រើនអនេកផងដែរ ។
លោកអភិបាលរងខេត្ដបានបន្ដថា ខេត្តក៏សម្បូរទៅដោយរមណីយដ្ឋានទេសចរណ៍ តំបន់ទេសចរណ៍ មានទេសភាពយ៉ាងស្រស់ត្រកាល ដែលអាចទាក់ទាញអ្នកទេសចរមកសម្រាក លម្ហែកម្សាន្ត ដ៏ច្រើនលើសលប់ ធ្វើឱ្យមានកំណើនភ្ញៀវទេសចរពីមួយឆ្នាំទៅមួយឆ្នាំ ៕
ដោយ៖ សំណាង
