ក្រោយពីល្បីល្បាញក្នុងពិភពបាល់ទាត់អឺរ៉ុបអស់រយៈពេលជាង ១០ឆ្នាំ តើ Lionel Messi និង Cristiano Ronaldo អាចទុកការប្រជែងរបស់ពួកគេមួយឡែក ហើយមកលេងរួមគ្នាជាមិត្តរួមក្រុមដែរទេ? ខណះលោក David Beckham អាចជាបុគ្គលម្នាក់ដែលធ្វើឱ្យរឿងនេះក្លាយជាការពិត ។
អតីតកីឡាករខ្សែបម្រើរបស់ក្លឹប Manchester United និង Real Madrid រូបនេះមានផែនការប្រកបដោយមហិច្ឆតាសម្រាប់ក្លឹបថ្មីរបស់គាត់។ ប្រធានក្រុមរបស់ Barcelona គឺ Messi ដែលមានវ័យ ៣២ឆ្នាំ និងខ្សែប្រយុទ្ធក្លឹប Juventus គឺ Ronaldo ដែលមានវ័យ ៣៥ឆ្នាំអាចនឹងបញ្ចប់អាជីពរបស់ពួកគេដោយលេងនៅក្លឹបតែមួយ គឺក្លឹប Inter Miami ដែលមានភាគហ៊ុនរបស់លោក Beckham នេះបើយោងតាមសារព័ត៌មាន The Mirror ។
សារព័ត៌មានខាងលើបានអះអាងថា ក្លឹបថ្មីនេះមានមហិច្ឆតាធំ ដែលក្នុងនោះ ពួកគេអាចទាក់ទាញយកកីឡាករឆ្នើមបំផុតក្នុងលោកទាំង ២ រូបមកសហរដ្ឋអាមេរិច ។
ក្លឹប LA Galaxy ក៏ចាប់អារម្មណ៍ចង់បាន Messi ដែរ ប៉ុន្តែអ្នកចាត់ការក្លឹប Minnesota United គឺលោក Adrian Heath ជឿថាកម្លាំងទាក់ទាញរបស់លោក Beckham អាចធ្វើឱ្យក្ដីសុបិនដើម្បីផ្សំផ្គុំកីឡាករខ្សែប្រយុទ្ធទាំងពីររូបក្លាយជាការពិត ។
លោក Heath បាននិយាយប្រាប់សារព័ត៌មាន Mirror ថា៖ “ចំពោះ Ronaldo និង Messi គោលដៅជាក់ស្ដែង២ សម្រាប់ពួកគេក្នុងលីគកំពូលអាមេរិចអាចជា Los Angeles និង Miami ។ បើពិនិត្យមើលទំនាក់ទំនងរវាងពួកគេ និងផែនការរបស់លោក Beckham ខ្ញុំគិតថាគេទាំងពីរនឹងទៅ Miami ហើយ ” ៕
ដោយ៖ តារា
