Raheem Sterling តារាឆ្នើមរបស់ក្លឹប Manchester City បានបង្ហើបឲ្យដឹងថា កូនស្រីរបស់គាត់គឺជាអ្នកគាំទ្ររបស់ Liverpool ដែលតែងតែព្យាយាមចង់ឲ្យគាត់ត្រឡប់ទៅក្លឹបចាស់វិញ ហើយបានច្រៀងចម្រៀងពី Mohamed Salah ថេមទៀតផង ។
ខ្សែប្រយុទ្ធគូទទយរូបនេះបាននិយាយពីកូនស្រីរបស់គាត់ថា៖ “គាត់មានអត្តចរិតដូចខ្ញុំដែរ ហើយនាងចូលចិត្តលេងដោយច្រៀងចម្រៀងរបស់ Mo Salah ឲ្យខ្ញុំស្តាប់ ។ នាងក៏ដឹងពីរឿងគូបដិបក្ខរវាង Liverpool និងក្លឹបដែលខ្ញុំកំពុងលេងដែរ ដូច្នេះនាងតែងតែច្រៀងពីចម្រៀងពួកគេ ហើយព្យាយាមបង្ខំឲ្យខ្ញុំទៅវិញ ។ តែនេះគឺជាគ្រាន់តែជាបុគ្គលិកលក្ខណៈរបស់នាងប៉ុណ្ណោះ” ។
សូមជម្រាបឱ្យដឹងថា Raheem Sterling បានផ្លាស់មកកាន់ Manchester City កាលពីឆ្នាំ ២០១៥ ជាមួយនឹងតម្លៃផ្ទេរប្រមាណ ៤៩លានផោន ។ Sterling ធ្លាប់ជាកីឡាករជម្រើសដំបូង នៅ Anfield ចំនួន ៣ រដូវកាលមកហើយ ។
ក្រោយពេលមកដល់ Man City កីឡាករអង់គ្លេសវ័យ ២៥ឆ្នាំនេះ ក៏ទទួលបានជោគជ័យជាបន្តបន្ទាប់ជាមួយក្រុមមេឃខៀវ ព្រមទាំងបានទទួលពានរង្វាន់ក្តិត្តិយសផ្ទាល់ខ្លួនជាច្រើនទៀត ។ ប៉ុន្តែកូនស្រីរបស់គាត់ ទំនងជានៅតែចង់ឲ្យគាត់ត្រឡប់ទៅលេងជាមួយ Liverpool ដែលជាគូបដិបក្ខពេញមុខពេញមាត់ជាមួយ Man City ក្នុងពេលបច្ចុប្បន្ន ៕
ដោយ៖ តារា
