សហព័ន្ធបាល់ទាត់អឺរុប ហៅកាត់ថា UEFA នៅក្នុងសប្តាហ៍នេះ បានព្រមានថា ដំណើរការប្រកួតបាល់ទាត់ Euro ២០២០ អាចនឹងជួបហានិភ័យ ប្រសិនបើ Covid-19 នៅតែរីកសាយភាយពេញប្រទេសនៅអឺរុប តាំងពីពេលនេះ រហូតដល់រដូវក្តៅនាពេលខាងមុខ ។
ក្តីបារម្ភរបស់ UEFA នេះ គឺបន្ទាប់ពីប្រទេសអ៊ីតាលី ដែលត្រូវធ្វើជាម្ចាស់ផ្ទះ ៤ ប្រកួត សម្រាប់ការប្រកួត Euro ២០២០ នៅពេលខាងមុខ កំពុងតែប្រឈមខ្លាំងនឹងការឆ្លងរាលដាលនៃមេរោគកូរ៉ូណា ដោយមកដល់ពេលនេះ ចំនួនអ្នកស្លាប់ និងអ្នកឆ្លងចេះតែកើនឡើងរហូតជាលំដាប់ ។ លីគកំពូលអ៊ីតាលីក្របខណ្ឌ Serie A ត្រូវផ្អាក ៤ ប្រកួត ដោយសារការផ្ទុះខ្លាំងនៃវីរុស Covid-19 នេះ ។
សមាជិកអ៊ីតាលី ក្នុងនាយកប្រតិបត្តិក្នុងគណៈកម្មការបាល់ទាត់អឺរុប លោក Michele Uva បានលើកឡើងថា ពេលនេះ គ្រប់គ្នាកំពុងតែរង់ចាំមើលការវិវត្តន៍ថ្មីៗ ហើយគេក៏កំពុងតែឃ្លាំមើលស្ថានការគ្រប់ប្រទេសទាំងអស់ ។ ហើយប្រសិនបើស្ថានភាពកាន់តែអាក្រក់ គេអាចនឹងបិទ ឬ ផ្អាកការប្រកួតនោះតែម្តង ៕
ដោយ៖ តារា
