គម្រោងអច្ឆរិយភាពនៃទន្លេមេគង្គ (Wonders of the Mekong) សូមដកស្រង់ត្រីមានស្រកាមួយប្រភេទចេញពីប្រភពមគ្គុទ្ទេសក៍កាលពីពេលថ្មីៗនេះ ស្តីពីប្រភេទត្រីរស់នៅក្នុងដែនទឹកសាប នៃប្រទេសកម្ពុជា fishbase.org និង iucnredlist.org ដែលមានរស់នៅក្នុងទឹកភ្លាវ និងទឹកសាបនៃប្រព័ន្ធទន្លេមេគង្គក្នុងតំបន់អាស៊ី ។
ត្រីក្បក មានឈ្មោះវិទ្យាសាស្ត្រ (Tenualosa thibaudeaui) និងឈ្មោះជាភាសាអង់គ្លេស Laotian shad ត្រីក្បក មានស្តង់ដារប្រវែងដងខ្លួនអតិបរមា ៣០ ស.ម និងមានទម្ងន់អតិបរមា ១គីឡូក្រាម។ ជាប្រភេទធ្វើចរាចរ ត្រីក្បកគេសន្មតថា បានធ្វើចរាចរជាង ២០០០ គីឡូម៉ែត្រពីសមុទ្រ ចូលមករស់នៅតាមដងទន្លេធំៗ តំបន់ទំនាបតាមដៃទន្លេ និងទំនាបលេចទឹក នៃទន្លេមេគង្គលើ។ ត្រីក្បកស៊ីតែចំណីតូចល្អិតៗ ដែលយើងមិនអាចមើលឃើញដោយភ្នែកទទេបាន ដូចជាផ្លុងតុងរុក្ខជាតិ ផ្លុងតុងសត្វ និងបាក់តេរី និងប្រភេទសត្វតូចល្អិតផ្សេងៗទៀត ដែលរស់ក្នុងទឹក។ ត្រីក្បក ត្រូវបានក្រុមអ្នកវិទ្យាសាស្ត្រកត់ត្រាចូលក្នុងបញ្ជីក្រហម IUCN Red List Vulnerable (VU) ក្នុងឆ្នាំ២០១១ ជាប្រភេទត្រីដែលកំពុងរងគ្រោះ ដែលអាចឈានទៅផុតពូជ។
លក្ខណៈសម្គាល់ ត្រីក្បក គឺ ដងខ្លួនស្តើង ពោះរាងស្រួច ស្រកាទ្រនុងពោះស្រួចមានចំនួន ២០-៣០ ស្រកា ក្បាលធំ មាត់ធម្មតា មានស្នាមអុចមួយជូរចំនួនរហូតដល់ ១០ នៅពីលើខ្សែឆ្នូតចំហៀងខ្លួន។ សព្វថ្ងៃ ត្រីប្រភេទនេះកំពុងប្រឈម ទៅការនេសាទហួសកម្រិត និងការបាត់បង់ទីជម្រកដោយសារការអភិវឌ្ឍហេដ្ឋារចនាសម្ព័ន្ធ ជាពិសេស ការកសាងទំនប់វារីអគ្គិសនី ដែលរារាំងផ្លូវធ្វើចរាចររបស់ពួកវា ជាពិសេស ទំនប់វារីអគ្គិសនី ដុន សាហុង នៅល្បាក់ខោនក្នុងប្រទេសឡាវម្តង ៕
ដោយ៖ ស្រស់
