សហព័ន្ធកីឡាបាល់ទាត់កម្ពុជា FFC បានបង្ហាញជំហរយ៉ាងតឹងរឹងបំផុត នៅក្នុងការប្រយុទ្ធប្រឆាំងចំពោះអំពើ ពុករលួយក្នុងវិស័យកីឡាបាល់ទាត់កម្ពុជា ដោយត្រូវអនុវត្តន៍នូវការដាក់ពិន័យនេះ តាមរយៈការប្រកាសនៅលើទំព័រហ្វេសហ៊ុកផ្លូវការ កាលពីថ្ងៃទី០៤ ខែមីនា ឆ្នាំ២០២០ ។
FFC បានចេញសារនេះ ក្រោយសហ័ន្ធកីឡាបាល់ទាត់អាស៊ី AFC បានចេញចំណាត់ការដាក់ពិន័យលើកីឡាករបាល់ទាត់ប្រទេសឡាវចំនួន២រូប ក្រោយរកឃើញថា មានជាប់ពាក់ព័ន្ធការកំណត់លទ្ធផលប្រកួតទុកមុន ហើយសហព័ន្ធកីឡាបាល់ទាត់កម្ពុជាបានបង្ហោះនៅលើហ្វេសបុកផេកផ្លូវការរបស់ខ្លួនថា៖ “សហព័ន្ធកីឡាបាល់ទាត់កម្ពុជាប្រយុទ្ធប្រឆាំងដាច់ខាត ចំពោះអំពើពុករលួយក្នុងវិស័យកីឡាបាល់ទាត់នៅកម្ពុជា ដោយការកំណត់លទ្ធផលប្រកួតទុកជាមុន។ ដោយយោងសេចក្តីប្រកាសព័ត៌មានរបស់សហព័ន្ធកីឡាបាល់ទាត់ទី្វបអាស៊ី (AFC) ស្តីពីការដាក់ពិន័យដល់កីឡាករនៅក្នុងប្រទេសឡាវ ២រូប ដែលពាក់ព័ន្ធនឹងការកំណត់លទ្ធផលទុកជាមុន។ សហព័ន្ធកីឡាបាល់ទាត់កម្ពុជាសូមអំពាវនាវដល់មន្ត្រី ក៏ដូចជាកីឡាករឱ្យចៀសវាងឆ្ងាយពីសកម្មភាពនេះ ដែលវាអាចប៉ះពាល់ដល់កិត្តិយសប្រទេសជាតិ និង បុគ្គលខ្លួនឯងផ្ទាល់”។
លោក គល់ សុភារម្យ នាយករដ្ឋបាល និងជាអ្នកនាំពាក្យនៃសហព័ន្ធកីឡាបាល់ទាត់កម្ពុជាថ្លែងប្រាប់ទីភ្នាក់ងារសារព័ត៌មានកម្ពុជានៅថ្ងៃទី០៥ ខែមីនា ឆ្នាំ២០២០នេះថា អំពើពុករលួយក្នុងវិស័យកីឡាបាល់ទាត់ គឺជាឧបស័គ្គរាំងស្ទះដល់ដំណើរការអភិវឌ្ឍន៍របស់ខ្លួន មិនថាតែបាល់ទាត់នៅកម្ពុជានោះទេ ពោលគឺនេះគឺជាបំរាមនៅលើពិភពលោកទាំងមូល ហើយសហព័ន្ធកីឡាបាល់ទាត់កម្ពុជាប្តេជ្ញាចិត្តខ្ពស់ក្នុងការទប់ស្កាត់នៃអំពើពុករលួយក្នុងបាល់ទាត់ តាមរយៈការរៀបចំលទ្ធផលទុកជាមុនជាដើម។ លោកបានគូសបញ្ជាក់ថា៖ “បើមានអំពើពុករលួយមិនថាតែក្នុងបាល់ទាត់ទេ ពោលគឺនៅក្នុងសង្គមជាតិ ដែលធ្វើឱ្យសកម្មភាពនៃដំណើរការអភិវឌ្ឍន៍នោះមិនអាច ដើរទៅមុខបានទេ ពោលគឺដើរថយក្រោយ ” ។ លោកចាត់ទុកថា អំពើពុករលួយនោះគឺជាអំពើអវិជ្ជមាន ហើយប្រសិនបើគ្មានការដាក់ពិន័យរបស់សហព័ន្ធកីឡាបាល់ទាត់អាស៊ី (AFC) ថ្មីៗនេះ ក៏សហព័ន្ធកីឡាបាល់ទាត់កម្ពុជាតែងតែខិតខំប្រយុទ្ធប្រឆាំងជាដាច់ខាតផងដែរ។ នៅក្រោយពេល AFC ដាក់ពិន័យកីឡាករឡាវ២នាក់នេះ គឺសហព័ន្ធបាល់ទាត់កម្ពុជាក៏បានក្រើនរម្លឹកជាថ្មីជូនដល់សមាជិកក្លឹបនានា កីឡាករ មន្ត្រីក្នុងសហព័ន្ធខ្លួនឯង មន្ត្រីក្នុងក្លឹប កុំឱ្យកើតឡើងនូវអំពើអសកម្មបែបនេះកើតឡើងនៅក្នុងវិស័យកីឡាបាល់ទាត់កម្ពុជា ។
សូមបញ្ជាក់ថា សមាជិកក្រុមជម្រើសជាតិឡាវចំនួនពីររូប គឺកីឡាករ Khampheng Sayavutthi វ័យ៣៣ឆ្នាំ ដែលលេងឱ្យក្លិប Rangsit United FC នៃលីគលំដាប់ទី៤ ថៃ និងកីឡាករ Lembo Saysana វ័យ២៥ឆ្នាំ កីឡាកររបស់ក្រុម Electricite du Laos លីគកំពូលឡាវ ត្រូវបាន AFC ពិន័យមិនឱ្យមានសកម្មភាពក្នុងកីឡាបាល់ទាត់អស់មួយជីវិត ក្រោយបានរកឃើញថា បានប្រព្រឹត្តបទល្មើសតាមមាត្រា ៦៦.១ នៃក្រមវិន័យ និងក្រមសីលធម៌របស់ AFC នៅឆ្នាំ២០១៨ ។ លើសពីនេះ អតីតកីឡាករទាំងពីរនាក់នេះត្រូវបានគេរកឃើញថា មានកំហុសក្នុងការឃុបឃិតគ្នា ក្នុងការរៀបចំលទ្ធផលទុកជាមុន កាលពីការប្រកួតអន្តរជាតិរវាងក្រុមជម្រើសជាតិឡាវ ជាមួយក្រុមហុងកុង កាលពីថ្ងៃទី០៥ ខែតុលាឆ្នាំ ២០១៧ ផងដែរ ខណៈការប្រកួតនោះហុងកុងឈ្នះឡាវក្នុងលទ្ធផល ៤-០ ៕
ដោយ៖ តារា
