អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានលើកឡើងថា ការដឹកជញ្ជូនវត្ថុធាតុដើមដែលនាំចូលមកកម្ពុជា បានចាប់ផ្ដើមជាបណ្ដើរៗខ្លះហើយ ក្នុងនោះនឹងផ្តល់អាទិភាពចំពោះការដឹកជញ្ជូនវត្ថុធាតុដើមពីប្រទេសចិនចូលមកកម្ពុជា ។
ថ្លែងក្នុងសន្និសីទសារព័ត៌មាន កាលពីព្រឹកថ្ងៃទី០៥ ខែមីនា ឆ្នាំ២០២០ នៅទីស្តីការគណៈរដ្ឋមន្ត្រី ឯកឧត្ដមបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានគូសបញ្ជាក់ថា វត្ថុធាតុដើមបានចាប់ផ្តើមនាំចូលមកវិញជាបណ្តើរៗហើយ ដែលបញ្ហានេះ យើងត្រៀមថាបើវត្ថុធាតុដើមច្រើន នឹងត្រៀមបន្ថែមម៉ោងរដ្ឋបាល ដោយធ្វើការរហូតដល់ម៉ោង១១ ឬម៉ោង១២យប់បន្ថែមទៀត។
ឯកឧត្ដមបានបញ្ជាក់បន្ថែមថា៖ “យើងត្រៀមរួចហើយក្នុងនោះអំពីម៉ោងរដ្ឋបាល ខ្ញុំចង់ប្រាប់ថាយើងតាមដានជារៀងរាល់ថ្ងៃ ពីមួយថ្ងៃទៅមួយថ្ងៃ ពីមួយសប្តាហ៍ ទៅមួយសប្តាហ៍ ឃើញថាវត្ថុធាតុដើមចាប់ផ្តើមមកវិញបណ្តើរៗហើយ ។ យើងត្រៀមថាបើវត្ថុធាតុដើមច្រើន យើងត្រៀមបន្ថែមម៉ោងរដ្ឋបាល ដោយធ្វើការដល់ម៉ោង១១ ឬ១២យប់ ដើម្បីធ្វើយ៉ាងណាឱ្យកប៉ាល់មកភ្លាម កុងតឺន័រដឹកចេញពីកំពង់ផែទៅរោងចក្រតែម្តង”។ ឯកឧត្ដមបានបន្ដថា នៅពេលមានបញ្ហាជំងឺកូវីដ-១៩នេះកើតឡើងយើងដឹងទាំងអស់គ្នាហើយថាមានការខ្វះខាតក្នុងការផ្គត់ផ្គង់វត្ថុធាតុដើម។ ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថបានចេញលិខិតមួយ ដោយតម្រូវឱ្យអគ្គនាយកដ្ឋានគយ និងរដ្ឋាករកម្ពុជាចាត់ទុកថា នេះគឺជាការងារអាទិភាពឱ្យបានជាអតិបរមា ក្នុងការសម្រួលការនាំចូលវត្ថុធាតុដើមលើវិស័យកាត់ដេរ និងគ្រឿងបង្គុំសម្រាប់ផលិតវត្ថុនាំចេញផងដែរ ។ ឯកឧត្ដមបានបន្ថែមថា អគ្គនាយកដ្ឋានគយ និងរដ្ឋាករកម្ពុជា បានបើកច្រកពិសេសមួយសម្រាប់ការដឹកជញ្ជូនវត្ថុធាតុដើមសម្រាប់វិស័យកាត់ដេរផងដែរ ហើយវត្ថុធាតុដើមលើវិស័យកាត់ដេរ គឺជាអាទិភាពទីមួយ ។
ឯកឧត្ដម ស សុខសេនសាន អគ្គលេខាធិការ នៃអគ្គលេខាធិការដ្ឋាន ក្រសួងសេដ្ឋកិច្ច និងហិរញ្ញវត្ថុបានលើកឡើងថា បច្ចុប្បន្ននេះ ពិភពលោកបានកំពុងពិនិត្យយ៉ាងយកចិត្តទុកដាក់ចំពោះបញ្ហាសេដ្ឋកិច្ច ក្រោយពីជំងឺកូវីដ-១៩ បញ្ចប់ ហើយប្រទេសជិតខាងកម្ពុជាក៏បន្តមើលផងដែរ។ ប៉ុន្តែអ្វីដែលយើងមិនអាចឆ្លើយតបាននោះគឺទំហំ នៃជំងឺនេះថាតើមានកម្រិត និងមានរយៈពេលប៉ុន្មាន។ ឯកឧត្ដមបានបន្ដថា សម្រាប់កម្ពុជាយើងនៅពេលសកលលោកប៉ះពាល់ជំងឺនោះយើងក៏ទទួលរងដែរ ប៉ុន្តែមកដល់ពេលនេះមិនទាន់មានការរាលដាលខ្លាំងនោះទេ។ ដូច្នេះបើមានការរីករាលដាលជំងឺនេះខ្លាំងនៅលើសកលនោះទំហំសេដ្ឋកិច្ចរូម ទាំងកម្ពុជាក៏នឹងមានការប៉ះពាល់ខ្លាំងធ្ងន់ធ្ងរដែរ។ ឯកឧត្ដមបានលើកឡើងថា លទ្ធផលនៃការព្យួរប្រតិបត្តិការនៅតាមរោងចក្រមិនមែនមានសម្រាប់កម្ពុជានោះទេ គឺប៉ះពាល់សំខាន់នោះគឺវត្ថុធាតុដើមដែលនាំពីប្រទេសចិនដែលជាកន្លែងផ្ទុះមេរោគកូវីដ-១៩ ដែលមានភាពរអាក់រអួល ៕
ដោយ៖ បូណា
