ក្នុងសន្និសីទសារព័ត៌មានស្ដីពីកូវីដ-១៩ កាលពីរសៀលថ្ងៃទី០៥ ខែមីនា ឆ្នាំ២០២០ លោកជំទាវវេជ្ជបណ្ឌិត ឱ វណ្ណឌីន បានថ្លែងថា៖ “ដោយមានការចោទថា ក្រសួងសុខាភិបាលលាក់ព័ត៌មានដើម្បីការពារមុខមាត់រាជរដ្ឋាភិបាល គឺកម្មវិធីនាពេលនេះគោលបំណងរបស់យើងគឺបង្ហាញភាពពិតជាក់ស្ដែង។ ហើយខ្ញុំលើកឡើងច្រើនហើយដែលអំពីស្ថានភាពលើសកលលោក និងប្រទេសយើង ដែលយើងអត់មានហេតុផលអ្វីទាំងអស់ សម្រាប់ការលាក់លៀមព័ត៌មាន” ។
លោកជំទាវថ្លែងថា គិតមកទល់ពេលនេះកម្ពុជា បានយកសំណាកទាំងអស់ចំនួន ១៤៥នាក់ មកធ្វើតេស្តនៅវិទ្យាស្ថានប៉ាស្ទ័រ ហើយមានតែ១ករណីតែប៉ុណ្ណោះ ដែលបានកើតជំងឺកូវីដ-១៩ ទៅលើជនជាតិចិន នៅខេត្តព្រះសីហនុ ដែលបានព្យាបាលឱ្យជាសះស្បើយហើយដែរ ។ ចំណែកចំនួន ១៤៤ទៀត គឺមិនមានជំងឺនេះនោះទេ ។
លោកជំទាវបានបន្ដថា តាមអនុសាសន៍របស់ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ក្រសួងសុខាភិបាលក៏បានបង្កើនការត្រៀមឆ្លើយតបបន្ថែមទៀតដើម្បីការទប់ស្កាត់ប្រយុទ្ធប្រឆាំងនឹងជំងឺកូវីដ-១៩នេះ។ ជាមួយគ្នានេះ ក្រសួងក៏បានធ្វើការបដិសេធជាបន្តបន្ទាប់ពីប្រភពព័ត៌មានក្លែងក្លាយមួយចំនួន ដែលបានផ្សព្វផ្សាយទាក់ទងការកើតមានឡើងនូវការឆ្លងជំងឺកូវីដ-១៩ ដែលករណីទាំងអស់នោះ មិនមែនជាជំងឺកូវីដ-១៩ នោះទេ។ ចំពោះករណីដើរៗដួសសន្លប់នោះមិនមែនជាករណីជំងឺកូវីដ-១៩ នោះទេ ។
លោកជំទាវរដ្ឋលេខាធិការក៏បានអំពាវនាវឱ្យប្រជាពលរដ្ឋយកចិត្តទុកដាក់ពីបញ្ហាជំងឺនេះ ហើយបើមានករណីសង្ស័យនោះ សូមទៅពិគ្រោះយោបល់ជាមួយគ្រូពេទ្យ។ លើសពីនេះទៀត ត្រូវការពារ និងធ្វើអនាម័យជាប្រចាំ ដូចជាលាងដៃឱ្យបានញឹកញាប់ ការរស់នៅស្អាត ហូបស្អាតជាដើម។ លោកជំទាវបានលើកឡើងដែរថា ចំពោះករណីបុរសជនជាតិជប៉ុនឆ្លងជំងឺកូវីដ-១៩ ដែលចេញពីកម្ពុជា ឆ្ពោះទៅប្រទេសជប៉ុននោះ គឺគិតមកដល់ល្ងាចថ្ងៃទី០៥ ខែមីនា ឆ្នាំ២០២០ ក្រសួងទទួលបានព័ត៌មានពីអាជ្ញាធរ និងមន្ទីរសុខាភិបាលខេត្តសៀមរាបហើយ គឺបានទៅរកឃើញមនុស្ស៤នាក់ ដែលពួកគាត់ធ្លាប់ធ្វើការទំនាក់ទំនងដោយផ្ទាល់ជាមួយបុរសជនជាតិជប៉ុននោះ ហើយអ្នកទាំង៤នាក់នោះ ក៏យកទុកដាច់ដោយឡែកផងដែរ។
លោកសាស្ដ្រាចារ្យ វ៉ាន់ ម៉ិច ឯកទេស និងប្រធានផ្នែកជំងឺសួតនៃមន្ទីរពេទ្យមិត្តភាព ខ្មែរ-សូវៀត និងជាប្រធានសមាគមគ្រូពេទ្យសួតកម្ពុជា ក៏បានលើកឡើងដែរថា ចំពោះរោគសញ្ញាករណីសង្ស័យថាមានជំងឺកូវីដ-១៩ មានដូចជា កំដៅលើស៣៨អង្សាសេ ករណីក្អក ឈឺបំពុងក ដកដង្ហើមពិបាក បូកនឹងប្រវត្តិធ្លាប់ទៅកន្លែងដែលសង្ស័យថាមានជំងឺកូវីដ-១៩ ហើយទាមទារតាមដានយៈពេល១៤ថ្ងៃ។ លោកសាស្រ្ដាចារ្យបានបន្ដថា បើមានករណីបែបនេះគឺត្រូវយកសំណាកគាត់មកធ្វើតេស្តនៅវិទ្យាស្ថានប៉ាស្ទ័រ ។
ជាមួយគ្នានេះដែរ លោកស្រី Phiomena Raftery មន្ត្រីបច្ចេកទេសនៃអង្គការសុខភាពពិភពលោកក៏បានពន្យល់អំពីលក្ខខណ្ឌដែលត្រូវធ្វើតេស្តរកមេរោគកូវីដ-១៩ ដោយមិនត្រូវធ្វើតេស្តគ្រប់មនុស្សនោះទេ។ លោកស្រីបានអះអាងថា ការធ្វើតេស្តចំពោះជនដែលមិនមានរោគសញ្ញា នឹងធ្វើឱ្យមានការខ្ជះខ្ជាយដល់ធនធាន និងពេលវេលា ៕
ដោយ៖ បូណា
