ថ្លែងក្នុងសិក្ខាសាលាស្ដីពីសុខភាព និងជំងឺមហារីកប្រព័ន្ធរំលាយអាហារ កាលពីថ្ងៃទី១៤ ខែមីនា ឆ្នាំ២០២០ នៅជម្ឈមណ្ឌល សិង្ហបុរី មេឌីខល សេនធឺរ ក្នុងរាជធានីភ្នំពេញ លោកវេជ្ជបណ្ឌិត JONATHAN FOO អ្នកជំនាញឯកទេសផ្នែកវះកាត់ជំងឺទូទៅ និងប្រព័ន្ធទ្វារបាត មកពីប្រទេសសិង្ហបុរីបានលើកឡើងថា ជំងឺមហារីកប្រព័ន្ធរំលាយអាហារពោះវៀនធំ និងទ្វារបាតគឺតែតែកើតនៅក្នុងពោះវៀនធំចាប់តាំងពីផ្នែកខាងឆ្វេងរហូតដល់ផ្នែកខាងស្ដាំ ហើយរោគសញ្ញា និងអាក្ការៈដែលកើតឡើងដោយសារតែជំងឺប្រព័ន្ធទ្វារបាតនេះ សង្កេតឃើញថា ពេលដែលបត់ជើងធំមកគឺមានលាយឈាមមកជាមួយលាមក ។
លោកវេជ្ជបណ្ឌិតបានបន្ដថា ជំងឺនេះ ប្រសិនបើមិនបានព្យាបាលឱ្យទាន់ពេលវេលានោះទេ គឺហានិភ័យដែលកើតឡើងចំពោះអ្នកមានបញ្ហាមហារីកពោះវៀនធំ និងទ្វារបាតនេះ នឹងធ្វើឱ្យស្ទះក្នុងពោះវៀនតែម្ដង ដោយសារតែមានដុំមហារីកដុះនៅក្នុងពោះវៀន និងអាចរាលដាលទៅសរីរាង្គផ្សេងៗទៀត។ ម្យ៉ាងវិញទៀត ប្រសិនបើយើងមិនបានបង្ការ និងព្យាបាលឱ្យទាន់ពេលវេលា ជំងឺនេះ នឹងចាប់ផ្ដើមរាលដាលដល់សរីរាង្គផ្សេងៗទៀតដូចជាតម្រងនោមជាដើម ជាពិសេសអាចធ្វើឱ្យអ្នកជំងឺឈានទៅដល់ការស្លាប់ ។
លោកវេជ្ជបណ្ឌិតបានណែនាំដល់ប្រជាជនកម្ពុជាថា ប្រសិនបើពេលបត់ជើងមកមានឈាមលាយមកជាមួយលាមកច្រើន កុំរង់ចាំបន្ដទៀត ត្រូវមកជួបជាមួយគ្រូពេទ្យឯកទេស និងថតឆ្លុះឱ្យបានច្បាស់លាស់ ដើម្បីការពារ និងព្យាបាលបានទាន់ពេលវេលា។ ទន្ទឹមនេះដែរ ចំពោះជំងឺមហារីកពោះវៀនធំ និងទ្វារបាតនេះ គឺកើតឡើងភាគច្រើនលើមនុស្សដែលមានអាយុចាប់ពី៤៥ឆ្នាំឡើងទៅ។ ដូច្នេះ ប្រជាជនកម្ពុជាដែលមានអាយុចាប់ពី ៤៥ឆ្នាំឡើង គួរមកជួបគ្រូពេទ្យ និងធ្វើការថតឆ្លុះ ដើម្បីស្វែងរករោគសញ្ញា ការពារនិងបង្ការបានទាន់ពេលវេលា ។ ដោយឡែក ជំងឺមហារីកពោះវៀនធំ និងទា្វរបាតនេះ អ្នកជំងឺខ្លះអាចកើតឡើងមុនអាយុ៤៥ឆ្នាំ ដោយសារតែអ្នកខ្លះមកពីឪពុកម្ដាយគាត់កើតជំងឺមហារីក ដូច្នេះករណីខ្លះអ្នកជំងឺអាចកើតចាប់តាំងពីអាយុជាង២០ឆ្នាំ ឬក៏មានអាយុជាង៣០ឆ្នាំក៏មាន។ តែទោះបីយ៉ាងណាក្ដី ចំពោះអ្នកដែលមានអាយុក្រោម៤៥ឆ្នាំ អ្នកជំងឺដែលកើតជំងឺមហារីកពោះវៀនធំ និងទ្វារបាតនេះគឺមានកម្រិតតិចតួចបំផុត ។
លោកវេជ្ជបណ្ឌិតបានលើកទឹកដល់ប្រជាជនកម្ពុជា ក៏ដូចជាអ្នកជំងឺទូទៅដែលមានអាយុចាប់ពី៤៥ឆ្នាំឡើងទៅ គួរទៅពិនិត្យសុខភាព និងថតឆ្លុះរកជំងឺមហារីកពោះវៀនធំ និងទ្វារបាត ប្រសិនបើពួកគាត់មិនមានប្រវត្ដិកើតជំងឺមហារីកនោះទេ។
លោកវេជ្ជបណ្ឌិតបានបង្ហាញនូវប្រភេទអាហារដែលអាចការពារជំងឺមហារីកពោះវៀនធំ និងទ្វារបាតបានគឺត្រូវទទួលទានអាហារស្រស់ៗ ប្រភេទអាហារណាដែលមិនផ្អាប់ ពីព្រោះបើយើងហូបតែអាហារប្រភេទផ្អាប់អាចប្រឈមនឹងកើតជំងឺមហារីក។ ក្រៅពីនេះ ដើម្បីបង្ការ និងការពារកុំឱ្យកើតជំងឺមហារីកពោះវៀនធំ និងទា្វរបាតនេះ លោកវេជ្ជបណ្ឌិត JONATHAN FOO បានណែនាំថា ត្រូវហូបចំណីអាហារណាដែលស្រស់ៗ ធ្វើលំហាត់ប្រាណ កុំពិសារបារី ឬសុរា គ្រឿងស្រវឹង ពីព្រោះតាមការសិក្សាបង្ហាញថា ការពិសារស្រានេះ គឺមានហានិភ័យខ្ពស់ និងមានទំនាក់ទំនងទៅនឹងជំងឺមហារីកនេះផងដែរ ៕
ដោយ៖ សំណាង
