ក្លិបបឹងកេតអែហ្វស៊ីរបស់កម្ពុជា បានរងបរាជ័យយ៉ាងដំណំក្រោមថ្វីជើងក្រុមខ្លាំងហ្វ៊ីលីពីន Ceres-Negros ដោយលទ្ធផល ៩-០ ក្នុងជំនួបបើកឆាក AFC CUP កាលពីយប់ថ្ងៃទី១៣ ខែកុម្ភៈ ឆ្នាំ២០១៨ ។ នេះជាកំណត់ត្រាចាញ់ច្រើនគ្រាប់ដ៏អាក្រក់មួយ ក្រោយទើបតែភ្លាត់ក្រោមថ្វីជើងក្រុមវៀតណាម ក្នុងវគ្គជម្រុះ TMCC ៥-១។
យ៉ាងណាក្តីលោក កែវ កុសល គ្រូបង្គោលបឹងកេតទើបតែងតាំង បានបង្ហាញសុទិដ្ឋិនិយមចំពោះក្រុមថាបានព្យាយាមអស់ពីសមត្ថភាព ។ នៅជើងទី២ បឹងកេត នឹងផ្លាស់ប្តូរយុទ្ធសាស្ត្រ ហើយនឹងរំពឹងថាធ្វើបានល្អ នៅក្នុងដីពហុកីឡដ្ឋានជាតិវិញម្តង។
បឹងកេត បានរបូត៥គ្រាប់នៅវគ្គទី១ និងបន្តអោយ Ceres-Negros រកបាន៤គ្រាប់បន្ថែមនៅវគ្គទី២។ ចប់ការប្រកួត ក្រុមកម្ពុជា ចាញ់ ៩-០ ។ លទ្ធផលនេះ បានធ្វើអោយ Ceres-Negros ឡើងទៅឈរលេខ១ក្នុងពូល តាមពីក្រោមដោយ Home United និងលេខ៣នៅលើក្រុម Shan United។ ចំណែក បឹងកេត នៅបាតតារាង។
ដោយ៖ តារា
