Mesut Ozil បានដឹងរួចមកអំពីគេធ្វើការប្រៀបធៀបខ្លួនទៅនឹងលោក Dennis Bergkamp អតីតកីឡាកររបស់ក្លឹប Arsenal ប៉ុន្តែបានអះអាងថាគាត់បានប្តេជ្ញាចិត្តដើម្បីរក្សាបាននូវឋានៈនៃវិរៈបុរសរបស់គាត់នៅឯកីឡដ្ឋាន Emirates ។

ក្នុងនាមជាកីឡាករដែលមានភាពច្នៃប្រឌិតដែលអាចធ្វើឱ្យការប្រកួតមើលទៅមានភាពងាយស្រួល នៅពេលនោះអតីតកីឡាករជម្រើសជាតិអាល្លឺម៉ង់រូបនេះត្រូវបានគេធ្វើការប្រៀបធៀបទេពកោសល្យរបស់គាត់ថាដូចគ្នានឹងអតីតកីឡាករឆ្នើមហូឡង់ម្នាក់នេះ ។ Bergkamp បានដើរតួនាទីយ៉ាងសំខាន់សម្រាប់ក្លឹបដែលមានមូលដ្ឋាននៅភាគខាងជើងទីក្រុងឡុងដ៍អស់រយៈពេល ៩ ឆ្នាំចន្លោះពីឆ្នាំ ១៩៩៥ ដល់ ២០០៦ ដោយស៊ុតបញ្ចូលទីបានចំនួន ១២០ គ្រាប់និងឈ្នះជើងឯកក្របខ័ណ្ឌ Premier League បីដង ជាមួយកាំភ្លើងធំ Arsenal ។

Ozil បានប្រាប់វេបសាយរបស់ក្លឹបថា៖ “អ្នកគាំទ្របានគាំទ្រខ្ញុំតាំងពីខ្ញុំបានមកដល់កាលពី ៥ ឆ្នាំមុន ហើយដោយសារតែរឿងនោះខ្ញុំអាចលេងបាននៅក្នុងរចនាបថដែលខ្ញុំពេញចិត្ត។ ខ្ញុំតែងតែចង់គ្រប់គ្រងការប្រកួតនេះដោយបញ្ចូនបាល់និងជួយក្រុមរបស់ខ្ញុំ ។ វាដូចខ្ញុំដែរតាំងពីដំបូង ។ នៅក្នុងទីតាំងរបស់ខ្ញុំអ្នកមានលទ្ធភាពជាច្រើនក្នុងការលេង ។ អ្នកអាចដណ្ដើមបាល់ ធ្វើការបញ្ជូនបាល់ ឬ ស៊ុតដោយខ្លួនឯង ។ ខ្ញុំត្រូវបានគេប្រាប់ច្រើនដងមកហើយក្នុងប៉ុន្មានឆ្នាំនេះថានេះគឺជារបៀបដែល Bergkamp លេង ។ ជាការពិតដែលធ្វើឱ្យខ្ញុំមានមោទនភាពហើយវាជាកិត្តិយសមួយក្នុងការប្រៀបធៀបជាមួយគាត់ “។

Ozil បន្តថា៖ “Bergkamp គឺជាវិរៈបុរសដ៏ឆ្នើមម្នាក់នៅ Arsenal ហើយគាត់គឺជាកីឡាករបាល់ទាត់ដ៏អស្ចារ្យម្នាក់ផងដែរ ។ ប៉ុន្តែខ្ញុំមិនចង់ប្រៀបធៀបខ្លួនឯងជាមួយនរណាម្នាក់ទេ ។ ខ្ញុំមានស្ទីលផ្ទាល់ខ្លួនរបស់ខ្ញុំ ហើយខ្ញុំមានវាចាប់តាំងពីខ្ញុំនៅក្មេង ។ ខ្ញុំមានមោទនភាពចំពោះការប្រៀបធៀបទាំងនេះ ប៉ុន្តែខ្ញុំជា Mesut Ozil ហើយខ្ញុំមិនទាន់បានបញ្ចប់នៅឡើយទេ”៕

ដោយ៖តារា