អ្នកចាំទីរបស់ក្លិប Paris Saint-Germain អ្នកចាំទីចាស់វស្សា Gianluigi Buffon បានធ្វើការគ្រាំទ្រដល់មិត្តរួមក្រុមរបស់ខ្លួនគឺ Kylian Mbappe ឱ្យឈ្នះពាន Ballon d’Or ឆ្នាំ ២០១៨ នេះ ។

Mbappe ត្រូវបានគេដាក់ឈ្មោះក្នុងចំណោមកីឡាករចំនួន ៣០ នាក់ចុងក្រោយសម្រាប់ពានរង្វាន់នេះក្រោយពីមានភាពភ្ញាក់ផ្អើលមួយនៅឆ្នាំ ២០១៨ ដែលខ្សែប្រយុទ្ធវ័យក្មេងរូបនេះបានជួយក្លឹប PSG លើកពានក្នុងស្រុកចំនួនបី មុនពេលជួយបារាំងទទួលបានជ័យជម្នះនៅ World Cup នៅប្រទេសរុស្ស៊ី ។ កីឡាករវ័យ ១៩ ឆ្នាំរូបនេះបានឈ្នះពានរង្វាន់កីឡាករវ័យល្អបំផុតប្រចាំព្រឹត្តិការណ៍ World Cup ក្រោយពីស៊ុតបញ្ចូលទីបានចំនួន ៤ គ្រាប់នៅក្នុងការប្រកួតរួមទាំងការប្រកួតវគ្គផ្តាច់ព្រ័ត្រពេលប្រកួតប៉ះ ក្រូអាត ផងដែរ ។

ហើយ Mbappe បានធ្វើឱ្យការប្រកួតរបស់គាត់ឈានដល់កម្រិតខ្ពស់ជាងនេះរហូតមកដល់ពេលនេះនៅក្នុងយុទ្ធនាការ ២០១៨-១៩ ដែលស៊ុតបញ្ចូលទីបាន ១០ គ្រាប់ក្នុងការបង្ហាញខ្លួនចំនួន ៧ លើកសម្រាប់ PSG ។ មនុស្សជាច្រើនបាននិយាយថា Mbappe នឹងឈ្នះ Ballon d’Or នៅពេលអនាគតប៉ុន្តែ Buffon ជឿជាក់ថាកីឡាករវ័យក្មេងរូបនេះនឹងទទួលបានពានរង្វាន់បុគ្គលធំបំផុតនៅឆ្នាំនេះ ។

Buffon បាននិយាយនៅក្នុងកម្មវិធីទូរទស្សន៍បារាំង Tout le Sport ថា៖ “ដោយផ្តល់នូវគុណសម្បត្តិរបស់គាត់អ្វីដែលគាត់បានបង្ហាញនៅលើទីលាននិងរបៀបដែលគាត់មាននៅក្នុងការប្រកួតបាល់ទាត់ពិភពលោកគាត់ពិតជាសមនឹងទទួលបានមែន ។នៅក្នុងប្រទេសអ៊ីតាលីគាត់ត្រូវបានគេប្រៀបធៀបទៅនឹង Roberto Baggio, Alessandro Del Piero និង Francesco Totti ។ប៉ុន្តែគាត់មានទេពកោសល្យនិងគុណសម្បត្តិបច្ចេកទេសពិសេសដែលខ្ញុំមិនធ្លាប់បានឃើញ ។ វាជាបាតុភូតមួយហើយប្រសិនបើគាត់នៅតែចង់ក្លាយជាមនុស្សដែលល្អបំផុត ប្រសិនបើគាត់នៅតែមានចំណង់ខ្លាំងហើយរក្សាឥរិយាបថធម្មតាគាត់អាចមានរយៈពេលយូរ” ។

ខ្សែបម្រើ Luka Modric ត្រូវបានគេចាត់ទុកថាជាអ្នកប្រកួតប្រជែងធំបំផុតក្នុងការដណ្ដើមពានរង្វាន់ Ballon d’Or បន្ទាប់ពីតារាឆ្នើមក្រូអាតរូបនេះ បានឈ្នះពានកីឡាករល្អបំផុតរបស់ FIFA និង កីឡាករឆ្នើមប្រចាំឆ្នាំរបស់ UEFA ។ ប្រសិនបើរូបគេមិនទទួលបានរង្វាន់នេះនោះទេ តារាឆ្នើមរបស់ក្លឹប Real Madrid និង ក្រូអាត រូបនេះជឿជាក់ថា Antoine Griezmann គឺជាកីឡាករបារាំងដែលសមនឹងទទួលបានពានរង្វាន់នេះដោយនាំមុខមិត្តរួមក្រុម Mbappe និង Raphael Varane របស់គេ ។

Luka Modric បានប្រាប់ដល់ France Football ថា៖ “ខ្ញុំនឹងដាក់ Antoine Griezmann ជាកីឡាករឈានមុខគេក្នុងចំណោមនៃកីឡាករឆ្នើមបារាំងទាំងបីនាក់ សម្រាប់អ្វីទាំងអស់ដែលគាត់បានសម្រេចនៅឆ្នាំនេះ ។ គាត់ ( Mbappe ) គឺជាទេពកោសល្យដ៏អស្ចារ្យដែលជាកីឡាករដ៏អស្ចារ្យសម្រាប់នាពេលអនាគត ប៉ុន្តែគាត់បានបង្ហាញពីកម្រិតដ៏អស្ចារ្យរួចទៅហើយ “។

គួរបញ្ជាក់ផងដែរថា កម្មវិធីប្រកាសអ្នកពានរង្វាន់ Ballon d’Or នឹងត្រូវធ្វើឡើងនៅក្នុងទីក្រុងប៉ារីសនៅថ្ងៃទី ៣ ខែ ធ្នូ ឆ្នាំ ២០១៨ ខាងមុខនេះ ៕

ដោយ៖តារា