Antonio Conte សារភាពថា គាត់កំពុងមានការលំបាកក្នុងការជ្រើសរើសកីឡាករសម្រាប់ការប្រកួតរបស់ Chelsea នៅក្របខណ្ឌ Champions League ជាមួយនឹង Barcelona ក្រោយពីធ្វើការប្រកួតជាមួយ Hull City នៅ FA Cup រួចមក។
ម្ចាស់ជើងឯក Premier League បានទទួលជ័យជម្នះដ៏អស្ចារ្យក្នុងលទ្ធផល ៤-០ ក្នុងការប្រកួតជុំទីប្រាំរបស់ពួកគេជាមួយ Hull City ខណៈពេលដែល Olivier Giroud បានស៊ុតបញ្ចូលទីជាលើកដំបូងសម្រាប់ Chelsea ហើយ Willian ធ្វើបានពីរគ្រាប់ម្នាក់ឯងយ៉ាងអស្ចារ្យ។
Conte ហាក់ដូចជាមិនសូវពេញចិត្ត Eden Hazard និង N’Golo Kante ដូចមុនឡើយ ខណៈពេលដែលគាត់ត្រូវគិតដល់ការប្រកួតនៅ Champions League វគ្គ ១៦ ក្រុមចុងក្រោយជាមួយនឹង Barcelona នៅសប្តាហ៍ក្រោយ។ ប៉ុន្តែ បន្ទាប់ពីជ័យជម្នះយ៉ាងកក់ក្តៅមក Conte បានសារភាពថា ពេលនេះគាត់មានជម្រើសច្រើនសម្រាប់ពិចារណា ដើម្បីទទួលភ្ញៀវកំពូលនៅ La Liga ។ Conte បានប្រាប់ទូរទស្សន៍ BT Sport ថា៖ «ប្រាកដណាស់ សម្រាប់យើងវាជារាត្រីដ៏ពិសេសមួយ ព្រោះយើងមានឱកាសឲ្យកីឡាករសំខាន់ៗធ្វើការសម្រាក»។
«ប៉ុន្តែ ស្របពេលជាមួយគ្នានេះដែរ ខ្ញុំបានឃើញកីឡាករមួយចំនួនកំពុងតែឡើងជើង។ ការធ្វើការសម្រេចចិត្តនៅមុនការប្រកួតជាមួយ Barcelona មានសារៈសំខាន់ណាស់ ព្រោះខ្ញុំមានជម្រើសច្រើន។ ឥឡូវនេះ យើងមានពេលបីថ្ងៃក្នុងការសម្រេចចិត្តជ្រើសរើសកីឡាករ»។ Willian បានរក្សាកន្លែងមួយនៅក្នុងជម្រើស ១១ នាក់ដំបូងពេលប៉ះជាមួយ Barcelona បន្ទាប់ពីបានបង្ហាញនូវទម្រង់លេងដ៏អស្ចារ្យ តាមរយៈការស៊ុតបញ្ចូលទីពីរគ្រាប់។ Conte បានបន្ថែមថា៖ «ប្រាកដណាស់ ទម្រង់លេងរបស់គាត់ពិតជាគួរឲ្យស្ញប់ស្ញែងណាស់»។
«ខ្ញុំសង្ឃឹមថានឹងអាចឃើញទម្រង់លេងបែបនេះជានិច្ច ព្រោះនៅពេលដែល Willian លេងបានល្អរបៀបនេះ វាធ្វើឲ្យខ្ញុំ ក្រុមទាំងមូល និងអ្នកគាំទ្ររបស់យើងមានភាពរីករាយ»។
ដោយ៖ តារា
