Wayne Rooney បាននិយាយថាគាត់តែងតែមានទំនុកចិត្តលើសមត្ថភាពរបស់គាត់ហើយដឹងថាគាត់នឹងទទួលបានជោគជ័យនៅឯក្លឹប Manchester United ។ Rooney បានចំណាយពេល ១៣ ឆ្នាំនៅលើទឹកដី Old Trafford បន្ទាប់ពីបានចូលរួមជាមួយពួកគេពីក្លឹប Everton កាលពីឆ្នាំ ២០០៤ ។

កីឡាករវ័យ ៣២ ឆ្នាំរូបនេះបានឈ្នះពានរង្វាន់ចំនួន ១៦ លើកក្នុងអំឡុងពេលរបស់គាត់នៅបិសាចក្រហមរួមទាំងពានរង្វាន់ក្របខ័ណ្ឌ Premier League ចំនួនប្រាំដង ពានរង្វាន់ FA Cup មួយ League Cup ចំនួនបីដង និង Champions League មួយដងផងដែរ ។ នៅទីបំផុតគាត់បានចាកចេញពីក្លឹបបីសាចក្រហមកាលពីពីរដូវក្តៅមុនដើម្បីត្រលប់ទៅលេងនៅក្លឹប Everton វិញមុនពេលចូលរួមជាមួយក្លឹប DC United នៅក្នុងក្របខ័ណ្ឌ MLS កាលពីខែមិថុនាកន្លងទៅនេះ ។ Rooney មានអាយុត្រឹមតែ ១៨ ឆ្នាំប៉ុណ្ណោះនៅពេលដែលគាត់បានផ្លាស់ទៅកាន់ក្លឹបបីសាចក្រហម ប៉ុន្តែគាត់គឺជាកីឡាករវ័យក្មេងដ៏អស្ចារ្យបំផុតម្នាក់សម្រាប់ក្រុមជម្រើសជាតិរបស់គាត់ ហើយបានបង្ហាញខ្លួនឲ្យអង់គ្លេសកាលពីឆ្នាំ ២០០៤ ។

Rooney បាននិយាយនៅក្នុងបទសម្ភាសន៍មួយជាមួយលោក Alan Shearer នៅក្នុងទូរទស្សន៍ NBC ថា៖ “ខ្ញុំតែងតែមានអារម្មណ៍ថាខ្ញុំល្អគ្រប់គ្រាន់ហើយខ្ញុំចង់បានការប្រកួតប្រជែងនៅទីនោះ ។ ដោយបានរីកចម្រើនខ្លាំងនៅក្នុងក្របខ័ណ្ឌ Premier League ខ្ញុំដឹងថាមានមនុស្សជាច្រើននិយាយអំពីពានរង្វាន់ក្របខ័ណ្ឌ Champions League ហើយវាមានសារៈសំខាន់យ៉ាងណាដើម្បីឈ្នះពាននោះ ប៉ុន្តែពានរង្វាន់ក្របខ័ណ្ឌ Premier League ដំបូងពិតជាពិសេស “។

Rooney អាចរកគ្រាប់បាល់បានចំនួន ២០៨ គ្រាប់នៅក្នុងអាជីពរបស់គាត់នៅក្របខ័ណ្ឌ Premier League ដែលជាប់ចំណាត់ថ្នាក់លេខពីរ បន្ទាប់ពីលោក Alan Shearer ដែលមានចំនួន ២៦០ គ្រាប់ ។ ប៉ុន្តែបើទោះបីជាមានការរីកចំរើនយ៉ាងខ្លាំងនៅចំពោះមុខគោលដៅរបស់កីឡាករ Rooney ក៏ដោយក៏គាត់បានចំណាយពេលវេលាជាច្រើនដើម្បីឱ្យគាត់អាចលេងបានល្អនិងដើម្បីបំពេញបំណងប្រាថ្នារបស់គាត់ ។

Rooney បន្តថា៖ “ខ្ញុំបានលេងក្នុងនាមជាខ្សែប្រយុទ្ធដោយផ្ទាល់ ( កាលពីរដូវកាល ២០០៩/១០ ) និងស៊ុតបញ្ចូលទីបានចំនួន ៣៤ គ្រាប់ ។ ខ្ញុំចងចាំថាខ្ញុំបានចូលទីលានបន្ទាប់ពីបានស៊ុតបញ្ចូលទី ១ ឬ ២ គ្រាប់ ហើយខ្ញុំមិនមានអារម្មណ៍ថាខ្ញុំលេងបានល្អនៅការប្រកួតនោះទេ ។ វាចម្លែកណាស់ដែលនោះជាពេលវេលាដែលខ្ញុំរៀនចេះអត់ធ្មត់ជាងមុននិងរង់ចាំឱកាសរបស់ខ្ញុំ ។ ខ្ញុំតែងតែចង់ព្យាយាមចូលរួមក្នុងការប្រកួត ប៉ុន្តែខ្ញុំដឹងថាក្នុងនាមជាខ្សែប្រយុទ្ធមួយប្រសិនបើអ្នកចង់រកគ្រាប់បាល់បានច្រើនអ្នកនឹងត្រូវធ្វើការងារបន្ថែមទៀតនៅក្នុងប្រអប់គ្រោះថ្នាក់ “។

វាមានរយៈពេល ១៦ ឆ្នាំមកហើយនៅសប្តាហ៍នេះដែល Rooney បានចូលទៅក្នុងឆាកជីវិតជាកីឡាករអាជីពនៅពេលដែលគាត់វ័យ ១៦ ឆ្នាំនៅក្លឹប Everton ដោយស៊ុតបញ្ចូលទីគ្រាប់ទីមួយនៅ Premier League ជាលើកដំបូងក្នុងការស៊ុតបញ្ចូលទីចំណាយជិត ៣០ ម៉ែត្រដើម្បីបញ្ចប់ភាពមិនស្គាល់ចាញ់ ៣០ ប្រកួតរបស់ក្លឹបកាំភ្លើងធំ Arsenal ។ Rooney និយាយថាគាត់ដឹងថាគាត់ជាកីឡាករដែលល្អបំផុតរបស់ក្រុម Everton បើទោះបីជាគាត់ចាកចេញពីសាលារៀនត្រឹមតែពីរបីខែក៏ដោយក៏គាត់បានចំណាយពេលត្រឹមតែ ២ រដូវកាលនៅកីឡាដ្ឋាន Goodison Park មុនពេលផ្លាស់ទៅក្លឹប Manchester United ។

ខ្សែប្រយុទ្ធរបស់ក្លឹប DC United រូបនេះបានបន្ថែមទៀតថា៖ “ខ្ញុំតែងតែមានទំនុកចិត្ត ។ នៅពេលនោះនៅអាយុ ១៦ ឆ្នាំ ខ្ញុំចងចាំមើលជុំវិញក្រុម Everton ជាលើកដំបូងនិងដឹងថាខ្ញុំជាកីឡាករល្អបំផុត ។ ខ្ញុំមានអារម្មណ៍បែបនេះ ។ ខ្ញុំដឹងយ៉ាងច្បាស់ថាសម្រាប់ខ្ញុំដើម្បីបន្តអាជីពរបស់ខ្ញុំ ខ្ញុំនឹងត្រូវទៅកន្លែងផ្សេងទៀត “៕

ដោយ៖តារា