យោងតាមការបោះពុម្ភផ្សាយការសែតកីឡាររបស់អាល្លឺម៉ង់ Kicker បានឲ្យដឹងថាក្លឹប Bayern Munich បានសម្រេចចិត្តមិនធ្វើឱ្យតម្លៃទិញផ្ដាច់កុងត្រារបស់កីឡាករ James Rodriguez ស្ថិតក្នុងតម្លៃ ៤២ លានអឺរ៉ូនៅចុងបញ្ចប់នៃការខ្ចីជើងរយៈពេល ២ ឆ្នាំពីក្លឹប Real Madrid នោះទេ ។
ក្លឹបបិសាចក្រហម Manchester United ក៏កំពុងមានគម្រោងវិនិយោគជាមួយតម្លៃ ២០០ លានអឺរ៉ូក្នុងការទិញកីឡាករល្អៗចូល ហើយ James មិនមែនជាផ្នែកមួយនៃផែនការទាំងនេះទេដោយខ្សែបម្រើសញ្ជាតិកូឡុំប៊ី រូបនេះមានការធ្លាក់ទម្រង់លេងនិងមិនសូវបានបង្ហាញខ្លួនក្រោមការដឹកនាំរបស់លោក Niko Kovac នៅកីឡាដ្ឋាន Allianz Arena ។
លោក Karl-Heinz Rummenigge នាយកប្រតិបត្តិរបស់ក្លឹប Bayern Munich ទើបតែបានបង្ហាញថាការសម្រេចចិត្តនេះជាការឯកតោភាគី ។ ខ្សែបម្រើវ័យ ២៧ ឆ្នាំរូបនេះបានបង្ហាញខ្លួនចំនួន ៤៩ ប្រកួតនៅក្នុងការប្រកួតទាំងអស់សម្រាប់ក្រុម Bayern ដែលគាត់បានស៊ុតបញ្ចូលទីចំនួន ១១ និងបញ្ចូនឲ្យគេស៊ុត ១៦ ដង ចាប់តាំងពី Bayern ខ្ចីជើងគាត់ពី Real កាលពីរដូវក្ដៅ ២០១៧ ។
James Rodriguez បានចំណាយពេល ៣ ឆ្នាំនៅក្លឹប Real Madrid ដោយបង្ហាញខ្លួនក្នុងការប្រកួតចំនួន ១១១ លើក ជាមួយនឹងការស៊ុតបញ្ចូលទីបានចំនួន ៣៦ គ្រាប់ និងបញ្ចូនបាល់ឲ្យមិត្តរួមស៊ុតចំនួន ៤០ ដង ហើយត្រូវបានគេជឿថាជាគោលដៅធំបផុតរបស់ក្លឹបសេះបង្កង់ Juventus ដើម្បីនាំយកសមាជិកជម្រើសជាតិកូឡុំប៊ី រូបនេះទៅចាប់ដៃគូរជាមួយនឹងកីឡាករ Cristiano Ronaldo វិញ ៕
ដោយ៖តារា
