លោក Jupp Heynckes អ្នកចាត់ការ Bayern Munich បានព្រមានកូនក្រុមខ្លួនកុំឲ្យមើលស្រាលលើ Besiktas ក្នុងជំនួប UEFA Champions League ថ្ងៃអង្គារ ទី២០ កុម្ភៈ វគ្គ១៦ក្រុម ជើងទី១។
ក្រុមម្ចាស់ផ្ទះអាល្លឺម៉ង់ទទួលភ្ញៀវមកពីទួរគីដែលឡើងដល់វគ្គ១៦ក្រុមលើកដំបូង។ ក្រោមការដឹកនាំពីគ្រូបង្វឹកជើងចាស់ Senol Gunes ក្រុមមានមូលដ្ឋាននៅអ៊ីស្តង់ប៊ុល ឈរកំពូលតារាងពូល G ពីលើ FC Porto, RB Leipzig និង Monaco ហើយមិនចាញ់សោះក្នុងចំណោម៦ប្រកួត។
លោក Heynckes និយាយថា Besiktas មានកីឡាករសម្បូរដោយបទពិសោធលើឆាកអន្តរជាតិ។ អ្វីដែលនៅពីក្រោយភាពខ្លាំងរបស់ Besiktas គឺគ្រូបង្វឹកវ័យ៦៥ឆ្នាំដែលពោពេញដោយបទពិសោធ និង មានសមត្ថភាពខ្ពស់ក្នុងការដឹកនាំក្រុម។ ពួកគេមានកាយសម្បទាល្អ និង អាចលេងបានយ៉ាងល្អ។ ចំណែកខ្សែការពារ Mats Hummels លើកឡើងថា ក្រុមខ្លួនត្រូវកែប្រែចំណុចមួយចំនួនទៀតដើម្បីមានឱកាសក្រសោបជើងឯក Champions League។
ដោយ៖ តារា
