Honda SuperCup ជាម៉ូតូល្បីច្រើនជំនាន់មកហើយ។ ម៉ូតូ Classic ដែលជាស៊េរីថ្មីឆ្នាំ ២០១៨ ទើបនឹងឃើញមានវត្តមានលក់នៅលើទីផ្សារក្នុងស្រុកកាលពីប៉ុន្មានថ្ងៃមុន ហើយបើតាមហាងនាំចូលមួយប្រាប់ថា លក់ដាច់ស្តុកបាត់ទៅហើយ។
តាមការឲ្យដឹងពីលោក ទួត សីហា ម្ចាស់ហាងលក់ម៉ូតូនៅម្ដុំគិរីរម្យប្រាប់ថា “និយាយទៅ ម៉ូតូហ្នឹងស្អាតទាក់ភ្នែកម្យ៉ាងដែរ គ្រាន់តែយកមកតែប៉ុន្មានម៉ោងប៉ុណ្ណោះ ក៏លក់អស់។ ម្យ៉ាងខាងលោកយកមកតែប៉ុន្មានគ្រឿងប៉ុណ្ណោះ មិនហ៊ានយកច្រើនប៉ុន្មានទេ តែឃើញគេមករកចង់បានម៉ូតូនេះច្រើនគ្នាដែរហ្នឹង!”
ចំពោះតម្លៃខ្ទង់ប្រមាណជា ២ ២៥០ ដុល្លារ សម្រាប់ទីផ្សារក្នុងស្រុក។ បើក្រឡេកមើលប្រទេសជិតខាងតម្លៃខុសគ្នាពោលគឺតម្លៃ ១ ៥៥០ដុល្លារ(នៅវៀតណាម) នៅថៃប្រមាណ ១ ៤៧០ ដុល្លារ។
ម៉ូដែលថ្មី Super Cub នៅតែរក្សារូបរាងស្ទើរដូចមុនដដែល ប៉ុន្តែមានបំពាក់នូវបច្ចេកវិទ្យាទំនើបដូចជាមានភ្លើងស៊ីញ៉ូជាប្រភេទភ្លើង LED មានធុងសាំងចំណុះ ៤,២ លីត្រ បំពាក់ដោយបច្ចេកវិទ្យាថ្មី ស៊ីសាំងតិចជាងមុន(PGM-Fi) ដោយ ១ លីត្រ ជិះបាន ៦០ គ.ម មានកន្លែងចាក់សោរបើកកែបប្លែកជាងមុន។
អាគុបស៊េរីថ្មីកម្លាំងម៉ាស៊ីន ១១០ សេសេ មានពណ៌ជាច្រើនដូចជា ពណ៌បៃតង-ស, ពណ៌ខៀវ-ស, ក្រហម-ស, លឿង-ស, ផ្កាឈូក-ស និង ពណ៌ទឹកដោះគោ-ស៕
អត្ថបទ៖ រក្សា
