Dortmund ទៅ​ឆក់យកកីឡាករម្នាក់វិញពី Chelsea ក្រោយ Arsenal អន្ទង Aubameyang បាន

17804
  • បើ​តាម​សារព័ត៌មាន​អាល្លឺម៉ង់ Blid ហើយ​យក​ចុះ​ផ្សាយ​ដោយ Metro ក្នុង​ថ្ងៃ​នេះ​ បាន​ឲ្យ​ដឹង​ថា ក្លឹប Borussia Dortmund បាន​ព្រមព្រៀង​ជាមួយ​ក្លឹប Chelsea ក្នុង​ការ​ខ្ចី​ជើង​ខ្សែ​ប្រយុទ្ធ Michy Batshuayi។ ​ការ​អះអាង​នេះ​ធ្វើ​ឡើង​បន្ទាប់​ពី ក្លឹប​យក្ស​អាល្លឺម៉ង់ ត្រូវ​បាន​គេ​រាយការណ៍​ថា​ បាន​ព្រមព្រៀង​ហើយ​ក្នុង​ការ​លក់ Pierre-Emerick Aubameyang ឲ្យ​ Arsenal ក្នុង​តម្លៃ​ ៥៥.៤ ​លាន​ផោន។

    យោង​តាម​ប្រភព​ដដែល ខ្សែ​ប្រយុទ្ធ​បែលហ្សិក Batshuayi នឹង​ទៅ​លេង​ឲ្យ​ Dortmund ក្នុង​នាម​ជា​កីឡាករ​ខ្ចី​ជើង​រហូត​ដល់​ចប់​រដូវ​កាល​នេះ។

    របាយការណ៍​ដែល​ថា Batshuayi ទៅ​ Dortmund លេច​ឡើង​ហាក់​ស្រប​នឹង​សំដី​របស់​អ្នក​ចាត់​ការ​ក្លឹប Chelsea លោក Antonio Conte ដែល​កាល​ពី​ថ្ងៃ​ម្សិលមិញ​ បាន​សារភាព​ប្រាប់​អ្នក​សារព័ត៌មាន​ថា លោក​មិន​មាន​ភាព​ប្រាកដ​ក្នុង​ចិត្ត​ទេ ទាក់​ទង​នឹង​អនាគត​របស់ Batshuayi។

    លោក​បាន​និយាយ​ថា៖ “បើ​សិន​ជា​ក្លឹប​សម្រេច​ថា ទិញ​កីឡាករ​ថ្មី អ៊ីចឹង​ខ្ញុំ​មិន​ដឹង​ទេ​ថា Batshuayi នឹង​បន្ត​នៅ​លេង​ឲ្យ​ក្លឹប ឬ​ចាក​ចេញ​នោះ​ទេ។ នៅ​ឬ​ចេញ ជា​ការ​សម្រេច​ចិត្ត​របស់ Batshuayi ផ្ទាល់”។

    សូម​បញ្ជាក់​ផង​ដែរ​ថា Batshuayi បាន​មក​ចូល​រួម​ជាមួយ Chelsea កាល​ពី​ខែ​ក្ដៅ​ឆ្នាំ ២០១៦ ក្នុង​តម្លៃ​ផ្ទេរ ៣៣​លាន​ផោន។ ខ្សែ​ប្រយុទ្ធ​រូប​នេះ មិន​សូវ​បាន​ចាប់​ផ្ដើម​ការ​ប្រកួត​ឡើយ​តាំង​ពី​ក្លាយ​ជា​កីឡាករ​ក្លឹប​តោ​ខៀវ​មក ដោយ​ភាគ​ច្រើន​ចំណាយ​ពេល​ស្ថិត​នៅ​លើ​កៅអី​បម្រុង។

    ទោះ​ជា​យ៉ាង​ណា ពេល​បាន​ចូល​លេង ខ្សែ​ប្រយុទ្ធ Batshuayi បាន​ធ្វើ​បាន​សម្រេច​នូវ​គ្រាប់​បាល់​សំខាន់ៗ​ជា​ច្រើន។ តួ​យ៉ាង កីឡាករ​បែលហ្សិក​ស៊ុត​ចូល​ដល់​ទៅ ២ គ្រាប់​ក្នុង​ការ​ប្រកួត​ជាមួយ Newcastle United ក្នុង​កម្មវិធី FA Cup ម្សិលមិញ៕

     

    ប្រភព៖ Metro ប្រែ​សម្រួល៖ ហ៊ីម រស្មី

  • ភ្ជាប់ទំនាក់ទំនងជាមួយ Merl Plus
  • អត្ថបទថ្មី