ការជួយសង្គ្រោះជាច្រើនដងរបស់ Wayne Hennessey និងការធ្វើមិនបានល្អរបស់ Spurs ទំនងជានឹងនាំឲ្យក្រុមទាំងពីរបញ្ចប់ការប្រកួតដោយលទ្ធផល ០ ស្មើទៅហើយ។ តែអ្វីគ្រប់យ៉ាងបានផ្លាស់ប្តូរនៅពេលដែល បាល់ជ្រុងរបស់ Christian Eriksen ត្រូវបាន Kane តែតបញ្ចូលទីបានយ៉ាងល្អ នៅនាទីទី ៨៨។
ក្នុងការប្រកួតដែលធ្វើឡើងនៅ Selhurst Park ឃើញថា Spurs ហាក់គ្រប់គ្រងបាល់បានច្រើន។ អ្នកចាំទីរបស់ Crystal Palace គឺកីឡាករ Hennessey បានជួយសង្គ្រោះបាល់ដែលស៊ុតដោយ Kane នៅត្រឹម ១០ នាទីដំបូង និងមួយគ្រាប់ទៀតនៅដើមតង់ទី ពីរ។
ទីបំផុត Kane ធ្វើបានសម្រេចនៅចុងម៉ោងទៅហើយ ពីការតែតបាល់ជ្រុង និងជួយឲ្យក្រុមខ្លួនឈ្នះ លើ Crystal Palace ក្នុងលទ្ធផល ១-០។ នេះជាការសោកស្តាយមួយដែរសម្រាប់ Crystal ដែលគ្មានឱកាសតាមរក១គ្រាប់វិញព្រោះចុងទឹកទៅហើយ។
លទ្ធផលនេះបានជួយឲ្យ Spurs ឡើងទៅឈរនៅលេខរៀងទី ៤ ក្នុងតារាង Premier League លើក្រុម Chelsea ដែលទើបចាញ់ Man Utd ២-១ ក្តៅៗ ។
ដោយ៖ តារា
