ឯកឧត្តម ហ៊ុន ម៉ានី រំពឹងថា ស៊ីហ្គេម ២០២៣ នឹងមានវត្តមានកីឡាករចេញពីខេត្តកំពង់ស្ពឺ

11704

ឯកឧត្តម ហ៊ុន ម៉ានី តំណាងរាស្រ្តមណ្ឌលខេត្តកំពង់ស្ពឺ បានមានប្រសាសន៍ថា កម្មវិធីបាល់ទាត់ ណាហ្គាវើលដ៏ បេះដូងសប្បុរស បានជួយជម្រុញអភិវឌ្ឍន៍ និងបណ្តុះបណ្តាលធនធានបាល់ទាត់នៅខេត្តកំពង់ស្ពឺ អោយមានសក្តានុពលនាពេលខាងមុខ ។

ឯកឧត្តម តំណាងរាស្រ្ត សង្ឈឹមជឿជាក់ថា តាមរយៈកម្មវិធីនេះវា និងជម្រុញអោយយុវជនបានបញ្ចេញសមត្ថភាព និងអភិវឌ្ឍន៍ខ្លួនអោយក្លាយជាកីឡាករបាល់ទាត់ជម្រើសជាតិ ជាពិសេសបង្ហាញវត្តមានជាកីឡាករខេត្តកំពង់ស្ពឺ ប្រកួត នៅស៊ីហ្គេម ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ ។ ឯកឧត្តម ហ៊ុន ម៉ានី បានលើកឡើងដូច្នោះ ក្នុងកម្មវិធីប្រគល់ជ័យលាភី ការប្រកួតយុវជនអាយុក្រោម ១៨ ឆ្នាំ នៅមន្ទីរអប់រំយុវជន និងកីឡា ។

ឯកឧត្តម បញ្ជាក់ទៀតថា ដើម្បីឲ្យគម្រោងអភិវឌ្ឍន៍វិស័យបាល់ទាត់ នៅក្នុងខេត្តកំពង់ស្ពឺ ទទួលបានជោគជ័យចាំបាច់ត្រូវភាគីពាក់ព័ន្ធ ដូចជា ខេត្ត មន្ទីរ ដៃគូឯកជន លោកគ្រូអ្នកគ្រូ និងប្អូនៗសិស្សានុសិស្សទាំងអស់ រួមសហការគ្នា ទើបសម្រេចបានលទ្ធផលផ្លែផ្កានាពេលខាងមុខ ។

លោក ម៉ៃ តុលា អគ្គលេខាធិការរងសហព័ន្ធបាល់ទាត់កម្ពុជា បានបញ្ជាក់ថា ការប្រកួតបាល់ទាត់យុវជនយុវនារីប្រចាំខេត្ត ដើម្បីជម្រើសរើសកីឡាករការិនីល្អៗ និងកម្មវិធីបណ្តុះបណ្តាលគ្រូបង្វឹកដែលរៀបចំដោយកម្មវិធីដូងសប្បុរសរបស់ក្រុមហ៊ុនណាហ្គាវើល នៅក្នុងខេត្តកំពង់ស្ពឺនេះ និងបង្កើតបានកីឡាករការិនីបាល់ទាត់ឆ្នើមកាន់តែច្រើន នៅពេលខាងមុខ ។ ហើយសហព័ន្ធបាល់ទាត់កម្ពុជាក៏រីករាយគាំទ្ររាល់ការអភិវឌ្ឍន៍បែបនេះផងដែរ ។

ចំណែកឯនាយកគ្រប់គ្រងណាហ្គាវើលដ៍ លោក Pern chen មានប្រសាសន៍ថា ការអភិវឌ្ឍន៍វិស័យកីឡា គឺជាគំនិតផ្តួចផ្តើមមួយសំខាន់ទាំង ៤ របស់ក្រុមការងារសង្គមណាហ្គាវើលដ៍បេះដូងសប្បុរស ។ យើងមានគោលបំណងអភិវឌ្ឍកម្មវិធីកីឡាសម្រាប់សហគមន៍ និងលើកទឹកចិត្តឲ្យយុវជនចូលរួមលេងកីឡា ដើម្បីបង្កើនសាមគ្គីភាពជាក្រុម និងភាពជាអ្នកដឹកនាំ ។

សូមបញ្ជាក់ថា ការប្រកួតបាល់ទាត់ខ្នាតតូចនេះមាន ២៨ ក្រុមចូលរួម យុវជន ១៩ ក្រុម និងយុវនារី ៩ ក្រុម ដំណើរការប្រកួតរយៈពេល ៤ ថ្ងៃ ជាលទ្ធផលចំណាត់លេខ ១ ផ្នែកយុវជនបានទៅវិទ្យាល័យកំពង់ស្ពឺ ចំណាត់ថ្នាក់លេខ ២ វិទ្យាល័យហ៊ុនសែនភ្នំស្រួច ចំណាត់ថ្នាក់លេខ ៣ វិទ្យាល័យវាលថ្ពង ។ ផ្នែកនារីចំណាត់លេខ ១ វិទ្យាល័យអន្លង់ជ្រៃ លេខ ២ វិទ្យាល័យឱរ៉ាល់ និងលេខ ៣ វិទ្យាល័យវាលពង់ ៕

ដោយ៖តារា

ភ្ជាប់ទំនាក់ទំនងជាមួយ Merl Plus
  • អត្ថបទថ្មី